Perezida wa Liberia arakomerewe azira ibyo yavuze ku baturage be ashima u Rwanda

Chief Editor | 28-07-2016
Perezida wa Liberia arakomerewe azira ibyo yavuze ku baturage be ashima u Rwanda

Perezida Ellen Johnson Sirleaf w’igihugu cya Liberia, arimo kotswa igitutu na bamwe mu baturage be azira amagambo yavuze avuye i Kigali, aho yerekanye ko u Rwanda na Ethiopia ari ibihugu abaturage be bakwiye kwigiraho, kuko byatejwe imbere n’ikinyabupfura, umurava no gukunda ibihugu byabo. Gusa bamwe bavuga ko yabatutse akabita abanebwe batagira ikinyabupfura.

Nk’uko bitangazwa na Capitol Times, ubwo yari ageze ku kibuga cy’indege mpuzamahanga cya Roberts mu gihugu cye cya Liberia avuye i Kigali, Madamu Ellen Johnson Sirleaf yavuze ko u Rwanda na Ethiopia ari ibihugu by’icyitegererezo bimaze gutezwa imbere no kuba bifite abaturage bafite ikinyabupfura, bakora cyane kandi bakaba bakunda igihugu cyabo. Ibi bihugu bibiri, nibyo yahayeho urugero abaturage b’igihugu ayobora, ngo babyigireho nk’inzira yabageza ku iterambere ryihuse.

JPEG - 168.5 kb

Aha Perezida Ellen yari ageze ku kibuga cy’indege i Kanombe aje mu nama y’abakuru b’ibihugu

Kuvuga ko abaturage b’u Rwanda na Ethiopia bakorana umurava kandi bakaba bagira ikinyabupfura, byatumye hari abamusamira hejuru bamushinja kubita abanebwe batagira ikinyabupfura kandi badakunda igihugu cyabo, kandi ari we ukwiye kubibazwa.

Umunyamategeko w’impirimbanyi mu by’uburenganzira bwa muntu muri Liberia witwa Tiawon Gongloe, ni umwe mu bayoboye imbaga y’abasaba Perezida Ellen ko yasaba imbabazi abaturage ba Liberia kuko yabasuzuguye akanabasuzuguza amahanga.

Tiawon Gongloe kandi avuga ko kuba Perezida wabo yaratanze urugero ku byo ibyo bihugu byagezeho mu myaka ishize kandi bikaba byarabaye nawe ahari, bitagaragaza intege nke z’abaturage ahubwo imiyoborere ye ari yo mibi itageza abaturage ku iterambere, kuko n’ibihugu yatanzeho urugero ibyo byagezeho bibikesha imiyoborere myiza.

Uyu mugabo avuga ko Perezida Ellen ayoboye igihugu cya Liberia imyaka 12 yose nyamara akaba atarabasha gutera ikirenge mu cya Perezida Paul Kagame w’u Rwanda ngo nawe afashe igihugu cye kugaragaramo impinduka zifatika mu iterambere.

KANDA HANO UREBE VIDEOS UTASANGA AHANDI