Raporo yerekanye ko amafaranga ya Leta yongeye kunyerezwa no gusesagurwa cyane

Chief Editor | 7-05-2016
Raporo yerekanye ko amafaranga ya Leta yongeye kunyerezwa no gusesagurwa cyane

Kuri uyu wa Gatanu tariki 6 Gicurasi 2016, nibwo umugenzuzi mukuru w’imari ya Leta, Biraro Obadiah, yagejeje ku Nteko Ishinga Amategeko y’u Rwanda; imitwe yombi, raporo igaragaza imikoresherezwe y’amafaranga ya Leta yo mu ngengo y’imari ya 2014/2015, aho byagaragajwe ko habayemo kunyereza no gusesagura amamiliyari.

Kudindiza imishinga, kudakurikirana imishinga kandi yarashowemo amamiliyari, bimwe mu byatanzweho amafaranga byangirikira mu bubiko nk’imiti ipfa ubusa abarwayi barayibuze, abanyereza n’abakoresha mu buryo bwo gusesagura amafaranga ya Leta, nibyo umugenzuzi w’imari ya Leta yagaragarije Inteko Ishinga amategeko y’u Rwanda nk’imvano yo kuba amafaranga arenga miliyari magana abiri na cumi (210.000.000.000) zaraburiwe irengero.

Imbere y’abadepite n’abasenateri, Biraro Obadiah ushinzwe ubugenzuzi bukuru bw’imari ya Leta, yagaragaje ko mu igenzura ryakozwe mu nzego n’ibigo 157, basanze inzego n’ibigo 78 ari byo byabashije gukora neza ibyari byaragenwe mu ngengo y’imari ya 2014/2015, bivuga ko ibindi bigo n’inzego 79 batabyubahirije uko byasabwaga.

Muri rusange, umugenzuzi mukuru w’Imari ya Leta yagaragaje ko ingengo y’imari yakoreshejwe ku kigero cya 88% mu gihe andi mafaranga yari muri iyo ngengo y’imari ya 2014/2015 yo yaburiwe irengero.

Mu bigo bya Leta n’inzego byashyizwe mu majwi, harimo ikigo cya RSSB cyaguze ibintu bifite agaciro ka miliyoni 978 nyamara ntibikoreshwe, imiti yaguzwe na Minisiteri y’ubuzima igatwara asaga miliyoni 714 ikangirikira mu bubiko. Hanenzwe kandi ibigo nka REB, icyahoze ari EWSA, Kaminuza y’u Rwanda n’amashuri ayishamikiyeho n’ibindi.

Nyuma y’uko Obadiah Biraro atangaje ko hagomba gushakwa no kunozwa uburyo bwo kurwanya isesagurwa ry’amafaranga ya Leta, abagize Inteko Ishinga amategeko nabo bagaragaje ko batishimiye uburyo aka kayabo kaburiwe irengero.

KANDA HANO UREBE VIDEOS UTASANGA AHANDI