Rurageretse hagati y’umunyemari Rujugiro na Leta y’u Rwanda ashinja gufatira imitungo ye

Chief Editor | 7-09-2016
Rurageretse hagati y’umunyemari Rujugiro na Leta y’u Rwanda ashinja gufatira imitungo ye

Umunyemari Tribert Ayabatwa Rujugiro, avuga ko azagerageza gukora ibyo ashoboye byose ngo agaruze imitungo ye ahamya ko yafatiriwe na Leta y’u Rwanda mu buryo budakurikije amategeko. Kuri uyu wa Kabiri tariki 6 Nzeri 2016, Urugereko rwa mbere rw’Urukiko rwa Afurika y’Uburasirazuba rwatangiye kumva ibirego by’uyu munyemari uvuga ko Leta y’u Rwanda yafatiriye imitungo ye mu buryo butemewe n’amategeko.

Mu kwezi k’Ukwakira 2014, nibwo uru rukiko rwategetse ko urugereko rwarwo rwa mbere rwongera guha agaciro ikirego cya Rujugiro uvuga ko Leta y’u Rwanda yamufatiriye imitungo mu buryo budakurikije amategeko. Nk’uko ikinyamakuru The East African kibivuga, umwanditsi w’uru rukiko witwa Yufnalis Okubo, yavuze ko hari abantu bavuga ko bafite imigabane mu nyubako izwi nka UTC iri mu mujyi wa Kigali rwagati, abo bakaba barasabye ko nabo bashyirwa mu baburanyi, bikaba bisa n’ibyahinduye isura y’urubanza.

Rujugiro, abicishije mu nyubako ya UTC nk’umwe mu banyamigabane bayo b’ingenzi, yareze Leta y’u Rwanda muri uru rukiko rukorera i Arusha muri Tanzania avuga ko Leta y’u Rwanda, ibinyujije muri Komisiyo y’Umujyi wa Kigali ishinzwe gucunga imitungo yatawe na ba nyirayo, yafatiriye imitungo ye nyuma y’uko agiye mu buhungiro mu gihugu cya Afurika y’Epfo.

JPEG - 57 kb

Iyi ni inyubako ya UTC iri mu mujyi wa Kigali rwagati, aho benshi bakunda kwita kwa Rujugiro

Uretse iyi nyubako y’ubucuruzi avuga ko ifite agaciro ka miliyoni 20 z’amadolari, ni ukuvuga asaga 16.000.000.000 uyabaze mu mafaranga y’u Rwanda, Rujugiro ashaka ko yanasubizwa indi mitungo irimo inyubako iri i Gikondo mu karere ka Kicukiro ndetse n’imigabane ye iri mu ruganda rw’icyayi ruri mu Majyepfo y’igihugu.

Urukiko rugomba kubanza rukongera gusuzuma niba ikirego gifite ishingiro hatitawe ku myanzuro n’ibindi byakozwe n’urukiko rwari rwabanje gukurikirana iki kibazo nk’uko byemejwe na Me Aloys Mutabingwa, umunyamategeko wo mu mujyi wa Kigali akaba yaranahoze ari umunyamabanga wungirije w’urukiko rwa Afurika y’Uburasirazuba.

JPEG - 71.5 kb

Iyi ni inzu ya Rujugiro iri i Gikondo, naho bakunda kuhita mu mudugudu wo kwa Rujugiro

The East African ivuga ko hari itsinda ry’abanyamategeko bahagarariye Leta y’u Rwanda muri uru rubanza nk’uko byemezwa na Johnston Busingye, Minisitiri w’Ubutabera akaba n’intumwa nkuru ya Leta y’u Rwanda. Busingye kandi avuga ko ibyo Leta y’u Rwanda yakoze byari bikwiye kandi bikurikije amategeko, kuko byakozwe mu rwego rwo gucunga neza iyi mitungo ngo itangirika. Avuga ko Komisiyo ibishinzwe irimo gucunga iyi mitungo, n’ubwo Rujugiro we avuga ko imitungo ye yafatiriwe na Leta mu buryo budakurikije amategeko.

Rujugiro wagiye ashinjwa ibyaha birimo umugambi wo guhungabanya umudendezo w’igihugu ndetse akaza guhungira muri Afurika y’Epfo, muri 2010 yatangajwe mu kinyamakuru Forbes Magazine nk’umuherwe wa mbere mu Rwanda, ufite imitungo ya miliyoni 280 z’amadolari, ni ukuvuga ko ubu uyabaze mu mafaranga y’u Rwanda yakabakaba 230.000.000.000. Afite imitungo n’ibikorwa by’ubucuruzi mu Rwanda, mu Burundi, muri Uganda, muri Tanzania, muri RDC (Kongo), South Sudan, South Africa, Angola, Nigeria na United Arab Emirates.

KANDA HANO UREBE VIDEOS UTASANGA AHANDI