Twagiramungu yibasiwe n’imbaga y’abanyarwanda bamushinja gushaka kubaroga

Chief Editor | 1-07-2016
Twagiramungu yibasiwe n’imbaga y’abanyarwanda bamushinja gushaka kubaroga

Twagiramungu Faustin bakunda kwita Rukokoma, umunyepolitiki utavuga rumwe na Leta y’u Rwanda wigeze no kuba Minisitiri w’intebe, yageneye ubutumwa abanyarwanda babwamaganira kure bamushinja gushaka kubaroga ababibamo urwango n’amacakubiri ashingiye ku kinyoma.

Mu gitondo cyo kuri uyu wa Gatanu tariki 1 Nyakanga 2016, Twagiramungu Faustin yanditse ubutumwa burebure yanyujije ku rubuga rwa Facebook, avuga ko bugenewe abanyarwanda kandi agaragaza ko babayeho nabi, bayobowe nabi kandi hari ibyo batakorewe n’ubuyobozi burangajwe imbere na FPR, anashinja ubu buyobozi kudaha agaciro ubwigenge u Rwanda rwahawe mu 1962.

Ibi ariko, nta wigeze abyemera cyangwa ngo abyizere ahubwo abanyarwanda batandukanye batanze ibitekerezo byabo bagaragaza ko uyu musaza w’imyaka 71 afite ikibazo cy’imyumvire, bamusaba ko yagaruka mu Rwanda akava mu buhingiro akajya avuga ibyo azi, banamwihanangiriza kudakomeza kubaroga abashyiramo ibitekerezo birimo urwango no kubangisha igihugu.

IBI NI BIMWE MU BITEKEREZO ABANTU BATANZE BASUBIZA TWAGIRAMUNGU:

- Iyi nzehe izarekeraho kuroga ryari? Umusatsi warapfutse, amenyo yashizemo, asigaje izuba rimwe ariko aracyaroga yo kiyahura

- Twagiramungu, ubuse ni inde wakubwiye ko nta mahoro dufite? Ubwiyunge ni inshingano zacu. Amateka y’igihugu turayazi twarayatojwe, uyu munsi turawuzirikana kandi n’abayobozi bacu beza ushinja iryo kosa ntaryo bagira kuko barifite twabeguza kuko ubuyobozi buriho bukorera abaturage kandi bushyirwaho nabo. Ahubwo nimba wumva utirengagiza waza mu gihugu cyakwibarutse dore n’ibyaye ikiboze iracyonsa, uje ukajyanwa mu itorero byagufasha. Gusa mbonye umeze nk’aho ubuze indangagaciro z’umuco nyarwanda. Nimba muri wowe wumva ufite ibyakubaka igihugu wagihungiye iki?.. Ntukandike ibintu nk’ibyo kandi uzi ukuri aho kuri kuko n’imbere y’Imana uzabibazwa. Nanjye ndirengagije disi! Waba wubaha Imana se ugashaka kubibamo abantu ibitekerezo biri munsi ya ntabyo koko? Gusa nkuragije Imana izahindure intekerezo zawe ikwimikemo umutima muzima. Baho neza gusa dufite byinshi byo gukora ndetse no guhindura abantu nkawe.

- Ese ubundi ubwo ubona bitarakuyobeye muze? Nta ngoma n’imwe ujya wumvikana nayo! Reba Leta ya Habyarimana mwarananiranywe, FPR wirirwa utuka ibohoye igihugu yaguhaye ubuyobozi ndetse uba n’umuyobozi ukomeye nayo urayinanira! Uratorongera urahunga aho ugeze wifatanya na FDLR none nayo wayiciyemo ibice,none wirirwa ukora intambara z’ubusutwa ku mbuga nkoranyambaga! Kandi ubu igihugu kigeze kure ahubwo wowe wasigajwe inyuma n’amateka

- Ariko kuva mu bukoroni avuga ubwo njye simbyumva! Ubwose ba sogokuru bahunganga iki kandi wumva ingoma ya gikoroni yari yarangiye? Ubwose kuva mu bukoroni uvuga byagaragajwe no gutema abanyarwanda no kubamenesha bagahunga igihugu? Njye mbona politiki yawe yarashaje kubera ko wamunzwe ubwonko n’indwara y’amoko kandi ibyo twarabirenze! Nta kibazo umunyarwanda wa none afite cyereka inyangarwanda nkamwe ni mwe muhorana ibibazo kandi bitazanabashiramo kuko burya sibuno na FDLR wisunga ntacyo yakora ngo yongere gukora ibyo mushaka, ubu twaribohoye kandi turi maso twaharaniye gukura igihugu cyacu ahabi niyo mpamvu tutanakwihanganira uwashaka kutugarura inyuma nkawe!

- Ndatekereza ko iyo utanze ubutumwa hakabura n’umwe ugushyigikira wahitamo kutitera umwanya. Muze, hindura tukubaze amateka udusubize naho gutya ntacyo bitwigisha kitari kurwanyana.

- Ariko aho wavugiye ubusa kuma radio no ku mbuga hirya no hino uvuga amagambo aroga abo uruta ntabwo wageza aho koko? Uzasuzume ibitekerezo byawe ntacyo bifasha abo ubyandikira ahubwo umugani w’abantangiriye gabanya ubucucu n’ubuswa! Twe ibyo dutozwa hano mu gihugu biratwubatse kandi biracyubatse iguhugu!! Uzaze urebe u Rwanda rw’ab’imyaka 30 umusaza yatwubakiye ni paradizo uve kuri ubwo buswa muvugira hanze y’igihugu!

- Ntuwe uyobewe icuraburindi twavuyemo, abanyarwada tuzi aho tuvuye kandi dufite n’aho dushaka kujya, birambabaza cyane iyo mbona ubutumwa nk’ubu bw’umuntu nka Twagiramungu uvugira i Burayi ngo arashaka kwereka abanyarwanda umurongo mwiza kandi ahaheruka 2003, nawe uzakore urugendoshuri muri Garuka urebe maze ubone itandukaniro kandi bizanaba byiza politiki yawe uyikiniye iwanyu aho guhera ishyanga.

- Muze ntiworohewe ! Abantu bose iyo wanditse discours nk’izi zikubiyemo ibinyoma barakunyomoza kuko bari aho ukuri kuri. Gukomeza ibi ntabwo ari byabindi by’akiziritse ku muhoro gasiga kawuciye, oya ibintu byarahindutse. Ubu abantu bose twarajijutse ntitukigendera mu kigare ahubwo tugendera mu ndege ifite aho iva kandi ifite n’aho yerekeza. Imana ihe amahoro u Rwanda n’abanyarwanda

- Byarakuyobeye, icyiza ni uko warekera abafite agatege bakibasha gushyira mu bikorwa ibyateza imbere umunyarwanda uri mu gihugu cye. Naho wowe wibereye iyo warangiza ugatesha abantu umwanya wandika amatiku nk’aya?

- Ariko uyu musaza aremye mu biki koko? Hari aho cyavuze ngo abatware b’abatutsi ngo bakoreshaga uburetwa rubanda giseseka! Ariko Mana we! Mbega we! Hari icyo yise Ubucakara n’icyo yise ubukoloni, mbega ibi byose ari kubyizihiza! Igisaza nk’iki kidashaka kugenda mu nzira imwe n’Abanyarwanda ari bo ba nyir’igihugu, banyir’amateka, ibyiza cyakwipfira kabisa kuko n’izi nyandiko zacyo narazirambiwe.

- Wa nzehe we ubwo uba uhaze uburozi bw’abo ba koloni kuko wowe n’ubundi nibo ugikesha amaramuko. Mu Rwanda rero si uko kuko turigenga kandi bigaragazwa n’iterambere tugezeho tubikesha ubuyobozi bwiza.

- Jye nta mwanya nafata wo gusoma ibitekerezo bishaje by’uyu musaza rwose. Burya biragoye kugirango azahindure imyumvire ye y’ivangura

- Ese wa musaza we wakwisaziye neza wa mugani wa ya ndirimbo ngo "washaje utanduranyije". Ayo macakubiri yawe ko tuyazi warekeye aho! Wibaza ko abanyarwanda tukiri muri wa mwijima mwatwinjizagamo wo gucanishamo kabiri umuryango nyarwanda? Nakubwira ngo warakererewe! Ubu twasobanukiwe ikibi n’icyiza, tuzi ibyo dushaka, kandi tuzi n’aho tujya! Kandi kuva kera na kare uzi ko imvugo zawe zibereyeho gusenya zitubaka! Gusa birababaje kuba ari wowe wakabaye mu bambere batanga umusanzu wo kubaka urwakubyaye, ariko ukaba uri uwa mbere mu kurusenya. Erega abo bajyanama bawe bakurikiza wa mugani baciye ngo usenya urwe umutiza umuhoro! Ubu rero nkumare amatsiko nta njiji zikiriho zagutega amatwi...

KANDA HANO UREBE VIDEOS UTASANGA AHANDI