Twagiramungu yongeye kwita Perezida Kagame umunyagitugu bamuha urw’amenyo

Chief Editor | 9-09-2016
Twagiramungu yongeye kwita Perezida Kagame umunyagitugu bamuha urw’amenyo

Twagiramungu Faustin bakunda kwita Rukokoma, umunyapolitiki wigeze kuba Minisitiri w’intebe mu Rwanda ariko ubu akaba yarahunze igihugu, yahawe urw’amenyo n’abanyarwanda benshi nyuma y’uko yise Perezida Paul Kagame umunyagitugu, asubiramo ibyo aherutse n’ubundi kumuvugaho.

Mu minsi ishize, mu butumwa yanyujije ku mbuga nkoranyambaga, Twagiramungu yavuze ko yibaza impamvu Perezida Paul Kagame ashyigikiwe cyane n’ibihugu bibiri bikomeye ku isi, ari byo Leta Zunze Ubumwe za Amerika n’u Bwongereza kandi ku bwe abona ari umwe mu banyagitugu bo muri Afurika ndetse no ku isi. Ubu butumwa yongeye kubugarura mu mpera z’iki cyumweru n’ubwo benshi bamwereka ko yasaze abandi bakavuga ko abiterwa no kuba ashaje.

Uyu musaza avuga ko ibi bihugu byombi byavuzwe haruguru bibeshya ko bishaka ko demokarasi yamamara mu Rwanda, kandi ari politike nshya ya mpatsibihugu yahawe intera yo gushyigikira abanyagitugu kugirango barengere inyugu z’ibyo bihugu byombi.

Ibi ariko na mbere hose ubwo yabivugaga mbere byamaganiwe kure n’abanyarwanda benshi, batanze ibitekerezo byerekana ko Politiki ya Twagiramungu Faustin ishaje ndetse nawe ubwe akaba ashaka gusaza yanduranyije. Benshi bamubaza impamvu avuga ibiri mu Rwanda nk’aho abirusha abari mu gihugu.

Uwitwa Irakoze yagize ati: "Jye mbona wa musaza we hari byinshi wirengagiza kuko n’ubwo utunzwe n’abazungu ariko wakabaye ukurikira ibinyamakuru ukumva aho u Rwanda rugeze mu iterambere. Ubuhamya bw’abaturarwanda burabihamya. Ibyo byose uhora uvuga nibyo biguhejeje ishyanga kandi urwa Gasabo rwarafunguye imiryango. Ibikorwa by’umuntu nibyo duha agaciro kandi wowe ntacyo tuzi wamariye abanyarwanda ahubwo ukaba ushyize imbere gusenya ibyo tumaze kugeraho, mpora nsaba Imana ngo ibaturinde ndetse hamwe na bamwe muhuje ibitekerezo bishaje bitakigezweho."

Hari uwitwa Niyongira we yagize ati: "Wowe uzahera mu kuvuga gusa. Usabe Imana ahubwo ibyo bakuyorera ntibihagarare, naho ubundi uyu mukino warakunaniye."

Bimenyimana we ati: "Iyo ubuze icyo uvuga ntukavugishwe wa gisaza we cy’igisazi"

Dany yagize ati: "Ubutaha uzabanze usobanure ijambo "umunyagitugu" hanyuma usobanure uburyo HE Paul Kagame ari umunyagitugu kuko ubanza twe tutazi ijambo umunyagitugu icyo risobanura. Mbese ari twe turi mu gihugu nawe wagihunze ninde uzi ibiri mu Rwanda? Ninde wakubwiye ko wazongera kuzana izo ngengabitekerezo zawe mu Rwanda se ?"

Tumukuze we ati: "Nyakubahwa nta gitugu adushyiraho ahubwo rwose niba ufite icyo wungutse aho uri ngwino twifatanye kubaka igihugu cyacu."

Uwitwa Byiringiro ati: "Ko mbona usazanye amatiku muze? Uturusha kumenya igihugu twe dutuyemo ? Amahirwe dufite ni uko ushaje ntacyo wowe udutwaye, uri uw’amagambo gusa."

Gatebererwa ati: "Ariko wa njiji we aho mwagejeje u Rwanda n’aho Kagame yaruvanye hari aho bihuriye? Ubwo rero uzi ko ari nka kera, barakubeshye twamenye ubwenge abo mwishe barahagije, ubu turi gusana aho mwashenye wituvangira tugeze kure nta mwanya dufite wo kugutega amatwi."

Uyu musaza yari muri Guverinoma yashyizweho tariki 19 Nyakanga 1994 nyuma y’ihagarikwa rya Jenoside, yari igizwe na Perezida Pasteur Bizimungu, Visi Perezida Major General Paul Kagame ndetse na Twagiramungu Faustin ku mwanya wa Minisitiri w’Intebe, umwanya yavuyeho tariki 31 Kanama 1995.

KANDA HANO UREBE VIDEOS UTASANGA AHANDI