U Burundi bwibasiye Perezida Kagame mu magambo yuzuye urwango no guharabika

Chief Editor | 28-07-2016
U Burundi bwibasiye Perezida Kagame mu magambo yuzuye urwango no guharabika

Daniel Gelase NDABIRABE, umuvugizi w’ishyaka riri ku butegetsi mu Burundi

Ishyaka CNDD-FDD riri ku butegetsi mu Burundi, mu magambo yuzuye urwango, guharabika n’ibinyoma bidafite ishingiro, bibasiye Perezida Paul Kagame, umuryango FPR Inkotanyi n’igihugu cy’u Rwanda muri rusange, bagerekaho ibibazo byinshi byo mu Burundi.

Nk’uko bigaragara mu itangazo ryashyizwe hanze n’ishyaka rya CNDD - FDD riri ku butegetsi mu Burundi, kuwa Kabiri w’iki cyumweru, mu buryo bweruye ryerekanye uburyo ubutegetsi bw’u Burundi bwanga cyane Perezida Kagame n’ishyaka rya FPR Inkotanyi.

Mu byo iri shyaka rishinja Perezida Kagame, rivuga ko yagize uruhare runini mu bibi byabaye mu Burundi, bakavugamo ko we n’ingabo yari ayoboye zari iza RPA z’umuryango FPR Inkotanyi ari bo bishe Perezida Cyprien Ntaryamira wapfanye mu ndege na Perezida Juvenal Habyarimana, ndetse n’abaminisitiri babiri, Simbizi Cyriaque na Ciza Bernard.

Gusa kuri iyi ngingo, ubushakashatsi bwinshi n’ubuhamya bw’abantu batandukanye, byagiye bigaragaza ko indege yari irimo Perezida Habyarimana na Cyprien Ntaryamira, yaba yararashwe n’abahezanguni bo mu buyobozi bukuru ku ngoma ya Habyarimana Juvenal batifuzaga ko yazigera yemera gusinya amasezerano ya Arusha yemereraga abari impunzi gutaha mu mahoro no guhabwa umwanya mu gihugu.

Ishyaka CNDD-FDD ariko ryageze aho rirengera rivuga ko Perezida Paul Kagame yakoze Jenoside mu Rwanda akayegeka ku bandi, mu gihe amahanga n’umuryango w’Abibumbye bagiye bashimira kenshi Perezida Paul Kagame kuba yarahagaritse Jenoside yakorewe abatutsi nyuma akanubaka ubumwe n’ubwiyunge mu banyarwanda.

Iri shyaka rishinja Perezida Kagame ibintu byinshi, ndetse iri tangazo riri mu rurimi rw’ikirundi rigaragaramo amagambo arimo imvugo nyandagazi bakoresha bavugaho Perezida w’u Rwanda kugira uruhare mu bikorwa by’ubwicanyi mu Rwanda no mu Burundi, ubonamo ko ryasohowe rigamije gusa kugaragaza isura ye nabi.

KANDA HANO UREBE VIDEOS UTASANGA AHANDI