U Burundi bwongeye gupfobya Jenoside yo mu Rwanda no kwibasira Perezida Kagame

Chief Editor | 17-08-2016
U Burundi bwongeye gupfobya Jenoside yo mu Rwanda no kwibasira Perezida Kagame

Ishyaka riri ku butegetsi mu Burundi ryamaganye Roméo Dallaire wari umugaba w’ingabo za MINUAR zabungabungaga amahoro mu Rwanda mbere no mu gihe cya Jenoside yakorewe abatutsi, babikora mu buryo bupfobya kandi buhakana Jenoside yakorewe abatutsi mu Rwanda ariko bukaba n’uburyo bwibasira kandi buharabika Perezida Paul Kagame n’ingabo za FPR Inkotanyi yari ayoboye ubwo babashaga guhagarika Jenoside yakorewe abatutsi.

Mu itangazo ryahawe no 016/2016 ryashyizwe ahagaragara rikanasomwa kuri Radio na Televiziyo by’igihugu cy’u Burundi kuri uyu wa Kabiri tariki 16 Kanama 2016, ishyaka riri ku butegetsi muri iki gihugu cy’u Burundi, CNDD- FDD, rivuga ko mu gihe Umuryango w’Abibumbye utegenya kohereza abapolisi 228 bacunga amahoro mu Burundi, Gen. Romeo Dallaire wahoze ayoboye ingabo za MINUAR hamwe n’umunyakanadakazi mugenzi we Louise Arbour wahoze ayobora Urukiko mpuzamahanga mpanabyaha ku Rwanda rwari i Arusha muri Tanzania, baje mu karere ka Afurika y’Uburasirazuba bwa Afurika gutega imitego igamije guhirika ubutegetsi mu Burundi.

Iri tangazo rivuga ko Roméo Dallaire yaranzwe n’ibikorwa bibi ubwo yari mu Rwanda ayoboye ingabo za MINUAR, muri ibyo hakaba harimo ko yafashije Paul Kagame n’ingabo yari ayoboye gushyira mu bikorwa Jenoside, ikintu cyumvikana nko gupfobya no guhakana Jenoside yakorewe abatutsi mu Rwanda kuko aho kuvuga ko Perezida Kagame n’ingabo yari ayoboye bahagaritse Jenoside, bavuga ko ari bo ahubwo bayiteje bagafashwa na Romeo Dallaire.

Louise Arbour wahoze ayobora Urukiko mpuzamahanga mpanabyaha ku Rwanda rwari i Arusha muri Tanzania, nawe ubutegetsi bw’u Burundi buvuga ko yari yarahawe inshingano zo gucira urubanza abatsinzwe na FPR Inkotanyi bakemezwa ibyaha batakoze, bikaba ari nabyo bashaka ko yakorera abategetsi bariho mu Burundi, agategura uko azabagerekaho ibyaha batakoze.

Abayobozi b’u Burundi kandi bashinja aba banyakanada babiri, Romeo Dallaire na Louise Arbour, kuba babeshya ko mu Burundi hakorwa ubwicanyi bw’iyicarubozo, kuba hari abafatwa bagafungwa bazira ubusa kubera impamvu za politiki, kuba hari abanyerezwa, kuba Imbonerakure za CNDD-FDD zifata abagore n’abakobwa ku ngufu n’ibindi bibi, nyamara ubutegetsi bw’u Burundi bwo ngo buyoboye neza abaturage mu bwisanzure no muri demokarasi.

Mu ngingo zose zivuga kuri aba bombi, hagarukamo imvugo zisebya Perezida Paul Kagame n’ubutegetsi bw’u Rwanda muri rusange, ibi kandi bikaba bije nyuma y’uko mu minsi ishize hari hakozwe ibisa nabyo, muri rusange u Burundi bukaba bukomeza gusiga icyasha u Rwanda mu buryo bweruye.

SOMA INDI NKURU BIJYANYE HANO: U Burundi bwibasiye Perezida Kagame mu magambo yuzuye urwango no guharabika

Reba hano itangazo bashyize no ku rubuga rwa facebook:

KANDA HANO UREBE VIDEOS UTASANGA AHANDI