U Rwanda rurotswa igitutu kubera Ingabire Victoire n’abandi rushinjwa kurenganya

Chief Editor | 9-10-2016
U Rwanda rurotswa igitutu kubera Ingabire Victoire n’abandi rushinjwa kurenganya

Kuwa Kane tariki 6 Ukwakira 2016, nibwo abagize Inteko Ishinga Amategeko y’Ubumwe bw’ibihugu by’u Burayi batangaje ko bashishikajwe cyane n’ikibazo cya Ingabire Victoire wakatiwe imyaka 15 y’igifungo ndetse n’ikibazo cy’abantu bafungwa bazira ko banenze ubutegetsi bw’u Rwanda. Ibi ariko si bishya, ndetse Leta y’u Rwanda yagaragaje kenshi ko abavuga ibi baba birengagiza ukuri nkana.

Abadepite b’Inteko Ishinga Amategeko y’u Burayi, bavuga ko Ingabire wakatiwe gufungwa imyaka 15 azira ingengabitekerezo ya jenoside, gushaka guhungabanya umutekano w’igihugu no gufatanya n’imitwe y’iterabwoba, yaba yararenganye. Bavuga ko Leta y’u Rwanda ikwiye kureba uko urubanza rwe rusubirwamo rukaburanishwa mu mucyo.

Bavuga kandi ko hari abantu babuzwa ubwisanzure mu kuvuga ibyo batekereza, hakiyongeraho gufungwa no gutotezwa kw’abatavuga rumwe n’ubutegetsi, abanyamakuru n’abandi bose banenga Guverinoma y’u Rwanda. Basaba ko Leta yakwimakaza amahame ya Demokarasi igezweho, idaheza kandi idakumira buri wese.

Ibishinjwa u Rwanda bijyanye no kuba abantu badahabwa ubwisanzure, Leta yakunze kugaragaza ko ababikora badafite ukuri na gato. Mu ntangiriro z’umwaka ushize wa 2015, ubwo Perezida Kagame yabazwaga na Jeune Afrique niba koko mu Rwanda hari ubwisanzure mu gutanga ibitekerezo, yasubije agira ati: "Mpura n’abantu babarirwa mu bihumbi icumi mu manama nkora hirya no hino mu gihugu. Mu gihe cy’amasaha menshi, abaturage baravuga nanjye nkabatega amatwi. Banenga abayobozi babo, bavuga ku baturanyi babo, ibibazo n’impungenge zabo, bakisobanura hanyuma ngafata imyanzuro. Ibyo ni iki niba atari ubwisanzure mu kuvuga no gutanga ibitekerezo?"

Umukuru w’igihugu kandi yerekanye ko ababeshyera u Rwanda, babikora nkana birengagije ibimenyetso bifatika. Yagize ati: "Ibi ni ibyo bavuga ku bushake birengagiza ibimenyetso bifatika. Ntibasoma ibinyamakuru byacu, ntibumva amaradiyo yacu yigenga. Iyaba koko barakoze akazi kabo, bari kubona ko ahubwo igitandukanye n’ibyo bavuga, muri iki gihugu dushobora kunenga Guverinoma ndetse bakananenga Kagame ntibafungwe. Amategeko yacu ntahana abanenga, ahana gusa abatukana, abaharabika, ababiba urwango n’abamamaza Jenoside. Ni nk’ahandi hose bafite Demokarasi."

KANDA HANO UREBE VIDEOS UTASANGA AHANDI