USA: Uwatse ubwenegihugu abeshya ko ava inda imwe na Twagiramungu kamubayeho

Chief Editor | 25-05-2016
USA: Uwatse ubwenegihugu abeshya ko ava inda imwe na Twagiramungu  kamubayeho

Umucamanza wo muri Leta Zunze Ubumwe za Amerika, yafashe icyemezo cyo gutesha agaciro ubwenegihugu umunyarwanda witwa Ngombwa Gervais yari yarahawe nyuma yo kubeshya ko ari umuvandimwe wa Faustin Twagiramungu wigeze kuba Minisitiri w’Intebe ubu akaba ari mu buhungiro.

Muri Mutarama uyu mwaka, nibwo Gervais Ngombwa yafashwe, atangira gukurikiranwa n’ubutabera bwamushinjaga gusaba ubwenegihugu akoresheje ibinyoma n’amanyanga yo kwisanisha na Twagiramungu Faustin.

Uyu mugabo w’imyaka 56 y’amavuko, yahawe ubwenegihugu tariki 19 Ugushyingo 2004, kuva ubwo we n’umugore we na bamwe mu bana babo batangira kuba ahitwa Cedar Rapids. Nyuma yo gutahurwa, urukiko rwategetse ko ibyangombwa byose yari afite nk’umwenegihugu agomba guhita abitanga, ibyo bikaba birimo pasiporo, ikarita y’itora n’ibindi byose bihabwa abaturage.

Ubwo yasabaga ubu bwenegihugu, Ngombwa yavugaga ko ari murumuna wa Twagiramungu Faustin wari Minisitiri w’Intebe mu Rwanda nyuma ya Jenoside yakorewe abatutsi, akagaragaza ko uyu muvandimwe we yahise ahunga bityo gusubira mu Rwanda bikaba byashyira ubuzima bwe mu kaga, ibi akaba yarabivugaga abeshya kuko atari murumuna wa Twagiramungu mu by’ukuri.

Nk’uko ikinyamakuru Thegazette dukesha iyi nkuru kibivuga, hahise hatahurwa n’amakuru y’uko Ngombwa yahoze ari umwe mu bayobozi b’ishyaka rya MDR - Power, akaba ari mu bashakishwa n’ubutabera bw’u Rwanda kubera ibyaha bya jenoside ndetse hakaba harasohotse n’impapuro zisaba ko atabwa muri yombi.

Uyu mugabo ariko ntiyahanishijwe kwamburwa ubwenegihugu gusa kuko agomba kumara imyaka 30 yose muri gereza, kandi akaba agifite n’ibindi byaha akurikiranyweho yakoreye ahitwa Linn County, aha hakaba hari muri 2013 ubwo yatezaga umutekano mucye akanateza inkongi y’umuriro aho yabaga.

KANDA HANO UREBE VIDEOS UTASANGA AHANDI