Ubucuruzi bw’u Rwanda bwatewe igihombo kigaragara n’u Burundi

Chief Editor | 11-08-2016
Ubucuruzi bw’u Rwanda bwatewe igihombo kigaragara n’u Burundi

U Rwanda ruratangaza ko icyemezo cyafashwe n’u Burundi cyo gukumira ubucuruzi hagati y’ibyo bihugu ari icyemezo kiremereye kandi cyagize ingaruka zikomeye ku bucuruzi bw’u Rwanda.

Minisitiri w’ubucuruzi w’u Rwanda Francois Kanimba yatangaje ko ibyo u Rwanda rwoherezaga mu Burundi biturutse ku musaruro ukomoka ku nganda muri rusange byagabanutseho 40%.

Mu kiganiro yahaye abanyamakuru, Minisitiri w’ubucuruzi, inganda n’amakoperative yatangaje ko icyemezo giherutse gufatwa na Leta y’u Burundi cyo gukumira ubucuruzi hagati y’icyo gihugu n’u Rwanda cyakomye mu nkokora ubucuruzi bw’u Rwanda n’icyo gihugu ngo bwari butangiye kuzamuka ku buryo bushimishije.

Minisitiri Kanimba ati: "Inganda zacu zari zimaze kugira umuvuduko w’ubucuruzi mu gihugu cy’u Burundi. Abacuruzi benshi bari baragiyeyo bagasinya amasezerano n’abantu babafasha gucuruza ibicuruzwa bimwe na bimwe bikorerwa mu Rwanda, ariko aho icyo gihugu kigiriye mu bibazo na mbere y’uko bafata iki cyemezo cyo kuvuga ngo ntibacuruza n’u Rwanda, hagati y’umwaka 2014-2015 ibyo twoherezaga mu Burundi byagabanutseho hafi nka 40%".

Yavuze ko ubishyize mu mibare u Rwanda muri 2014 rwoherezaga mu Burundi ibicuruzwa bifite agaciro k’amadorali milioni 20, ayo akaba yaragabanutse akagera kuri milioni 12 z’amadorali ya Amerika. U Rwanda ngo rwoherezaga mu Burundi ibicuruzwa bijyanye ahanini n’ibikomoka ku buhinzi harimo ibirayi, ibishyimbo ibigori, amata n’ibindi.

Gusa Minisitiri Kanimba avuga ko kubyo u Rwanda rwakuraga mu Burundi nta gihombo na gito ruzagira, ngo kuko rwakuragayo imbuto gusa kandi ngo n’ubundi imbuto zavaga no mu bindi bihugu bikikije u Rwanda nka Uganda ndetse na Tanzania.

Iyi ni inkuru dukesha BBC

KANDA HANO UREBE VIDEOS UTASANGA AHANDI