Ubuzima bw’ubuhunzi butera umujinya ariko bugatera n’ishyaka - Perezida Kagame

Chief Editor | 26-05-2016
Ubuzima bw’ubuhunzi butera umujinya ariko bugatera n’ishyaka - Perezida Kagame

Kuri uyu wa Kane tariki 26 Gicurasi 2016, Perezida wa Repubulika y’u Rwanda, Paul Kagame, yakiriye abanyeshuri basaga 30 bo muri Kaminuza ya Wharton, abaganiriza byinshi ku mateka y’u Rwanda n’ubuzima bw’ubuhunzi yabayemo.

Jenoside yabaye mu Rwanda mu 1994 yatumye abantu benshi ku isi bamenya u Rwanda kubera amabi yarubayemo, ariko nyuma yayo amahanga noneho yagiye amenya iki gihugu cy’imisozi igihumbi kubera iterambere no kwiyubaka bidasanzwe rwabashije kugeraho. Ubwiwe amateka y’u Rwanda akabona n’aho ruri ubu ararutangarira, bikaba ari nako byagenze kuri aba banyeshuri bo muri Leta Zunze Ubumwe za Amerika bakiriwe na Perezida Kagame.

Perezida Paul Kagame yabasobanuriye uburyo amateka mabi y’u Rwanda ari yo abanyarwanda bakuyemo isomo ryo kwiyubaka. Yagize ati: "Abantu bishyize hamwe baravuga bati dushobora gukora ibihambaye nidutegura neza ahazaza hacu iby’ahashize tukabyirengagiza. Twiyumvishaga ndetse ko tugomba gushyira imbaraga mu iterambere kurushaho bitewe n’aho twari tuvuye ndetse n’aho twifuzaga kugera. Mu myaka 22 ishize twabonye ibintu bibi abantu bafite ubushobozi bwo gukora, uyu munsi nabwo ubona ibyiza ba bantu bashobora gukora."

Agaruka ku buzima bubi yabayemo ubwo yari impunzi mu gihugu cya Uganda, Perezida Kagame yavuze ko ubuzima bw’ubuhunzi butera umujinya ariko nanone bugatera ishyaka. Yagize ati: Kuba impunzi bikubakamo umujinya ariko nanone bikakubakamo ishyaka, ugashaka gusubira iwanyu ngo urwane ubaza impamvu bagufata gutyo".

Perezida Kagame avuga ko byashoboka ko abanyarwanda bungukiye mu bihe bikomeye banyuzemo, ubu bakaba barabashije kubaka amateka mashya.

KANDA HANO UREBE VIDEOS UTASANGA AHANDI