Umuryango umaze iminsi 10 urara ku gasozi ushavuzwa n’ibyo wakorewe na Minisitiri w’Ubutabera

Chief Editor | 11-08-2016
Umuryango umaze iminsi 10 urara ku gasozi ushavuzwa n’ibyo wakorewe na Minisitiri w’Ubutabera

Umuryango wa John Djumapili Nasibu, umaze iminsi 10 uba ku gasozi nyuma y’uko usohowe mu nzu tariki ya 1 Kanama 2016 bitewe na cyamunara yakozwe mu buryo bagaragaza nk’akarengane, gusa abagize uyu muryango bavuga ko bashavuye bakanaterwa agahinda no kubona Minisitiri w’Ubutebera ashyira ku mugaragaro imiterere y’iki kibazo akagenda yirengagiza akarengane bakorewe, ndetse ibigize izingiro ry’ikibazo ntagire icyo abivugaho kandi nabyo abizi hari n’impapuro z’ubutabera zibigaragaza.

Tariki 2 Kanama 2016, nibwo Ikinyamakuru Ukwezi.com cyanditse inkuru isobanura akarengane uyu muryango wagiriwe, biturutse ku mafaranga yayobejwe kuri konti na BCR isigaye yitwa I&M Bank, maze Minisitiri w’Ubutabera w’u Rwanda, Busingye Johnston aza gusobanura iby’iki kibazo n’uko akibona, gusa ibi umuryango wasohowe mu nzu wo uvuga ko byawubabaje bikomeye kuko batari biteze ko Minisitiri w’Ubutabera yakwemera kureka akarengane akareba akanavuga ibindi ntagire icyo akavugaho. Uyu muryango uvuga ko ubu urimo kugerageza uburyo bwose bushoboka wazageza ikibazo cyawo kuri Perezida Kagame, kuko bizeye ko we atakwihanganira akarengane kakorwa n’uwo ari we wese.

SOMA HANO INKURU EBYIRI ZABANJE:

* Kigali: Inzira y’agahomamunwa yatumye umukecuru w’imyaka 75 asohorwa akarazwa hanze

* Minisitiri w’Ubutabera yagize icyo avuga ku muryango uvuga ko wasohowe mu nzu ku karengane

Kuri uyu wa Kane tariki 11 Kanama 2016, ubwo Ikinyamakuru cyageraga ku Kacyiru aho uyu muryango wari usanzwe utuye, twasanze ibintu byabo byasohowe bigihari ndetse abo muri uyu muryango nabo bari kumwe nabyo, badutangariza ko nta handi bafite bashobora kuba, ahubwo bazakomeza kuba aha n’ubwo batinya ko impeshyi yazarangira imvura ikahabasanga ikanabanyagirira ibintu.

Hamwe n’ibikoresho byabo, bamaze iminsi 10 barara ku gasozi

Bamaze igihe ariko bagaragariza Ikinyamakuru Ukwezi.com cyakurikiranye iby’iki kibazo ko bababaye, bakaba batarabasha kwiyumvisha impamvu Minisitiri w’Ubutabera atigeze avuga ko ngingo zose zibarengera, akagaragaza impande zimwe.

Mu bintu 6 uyu muryango uvuga byawubabaje harimo:

1. Kuba ntacyo Minisitiri w’Ubutabera yavuze ku nkomoko y’ibibazo byose, kuko byakuruwe n’uko BCR yayobeje amafaranga akajya kuri konti itari yo, kandi iyo ajya kuri konti ya nyayo yari kwishyura umwenda hakiri kare, BCR ikaba yishyuza ibyangijwe n’amakosa yayo, kandi hakaba hari n’urubanza bayitsinzemo. Ibi bavuga ko ari akarengane n’amanyanga yakozwe na BCR ndetse ikaba yarabitsindiwe, bityo Minisitiri w’Ubutabera kuba atarigeze abivuga bakaba bibaza niba yaba yaremeye ko ako karengane kahabwa intebe.

2. Kuba cyamunara yarakozwe mu buryo budakurikije amategeko, Minisitiri mu gisubizo yatanze akaba yaravuze ko ntacyo yabivugaho kuko amategeko abimubuza, kandi ku ruhande rw’uwatsinze muri iyo cyamunara ho akaba yaremeye kubivugaho ndetse akanabisobanura.

3. Kuba ntacyo Minisitiri w’Ubutabera yavuze ku kuba Djumapiri yarasomewe mu rubanza atarezwemo atanahamagawemo ndetse na nimero yarwo yaratangiye atarimo, kandi ingingo ya 29 mu Itegeko Nshinga ikaba ivuga ko ibi bibujijwe. Iyi ngingo ivuga ko buri muntu wese afite uburenganzira ku butabera buboneye, burimo uburenganzira bwo kumenyeshwa imiterere n’impamvu z’icyaha akurikiranyweho, kwiregura no kunganirwa; gufatwa nk’umwere kugeza igihe urukiko rubifitiye ububasha rumuhamije icyaha; kuburanira imbere y’urukiko rubifitiye ububasha; kudakurikiranwa, kudafatwa, kudafungwa cyangwa kudahanirwa ibyo yakoze cyangwa atakoze, iyo amategeko y’Igihugu cyangwa amategeko mpuzamahanga atabifataga nk’icyaha igihe byakorwaga.

4. Kuba Djumapiri n’umugore we baranze gusohoka mu nzu, uyu muryango uvuga ko wababajwe n’uko Minisitiri yanze kugira icyo abivugaho kandi by’umwihariko umugore we udafite icyo ashinjwa akaba abifitiye uburenganzira yemererwa n’ingingo ya 49 mu Itegeko Nshinga igira iti: Umunyarwanda wese afite inshingano yo kubaha Itegeko Nshinga n’andi mategeko y’Igihugu. Buri Munyarwanda afite uburenganzira bwo kudakurikiza amabwiriza ahawe n’umutegeka mu gihe ayo mabwiriza abangamiye ku buryo bukomeye kandi bugaragara uburenganzira n’ubwisanzure bwa muntu.

5. Uyu muryango kandi uvuga ko washavujwe no kuba Minisitiri ntacyo yavuze ku manyanga n’akarengane byakorewe ku kigo cy’igihugu cy’ubutaka, muri cyamunara nyirizina no mu gushyira mu bikorwa ibyemezo by’urukiko. Urugero batanga, ni ukuba Urukiko rwaravuze ko kimwe cya kabiri cy’umutungo wa Djumapiri kitazakorwaho, ariko Minisitiri akemera ibyavuzwe n’umuhesha w’inkiko wabihinduyemo ko uwo mutungo wose uzatezwa cyamunara hanyuma kimwe cya kabiri cy’amafaranga avuyemo akaba ari yo ahabwa umugore. Aba bavuga ko batangajwe no kuba Minisitiri yaremeye ibyo yabwiwe n’Umuhesha w’Inkiko warangije uru rubanza mu buryo budakurikije amategeko, hanyuma we ntagire icyo abyikurikiraniraho.

6. Mu bindi uyu muryango uvuga ko byawubabaje, ni aho Minisitiri yagize ati: "Imanza, urwo Djumappili yareze I&M na Kambali, n’urwo uwashakanye na Djumapili yareze Umuhesha w’Inkiko ntiziraburanishwa. Djumapili akwiye gutegereza ibyemezo bizafatwa. Natwe n’uko". Aha bavuga ko batangajwe no kubona Minisitiri avuga ko izi manza zabaye kandi hari impapuro zerekana ko zaburanishijwe ndetse BCR igatsindwa, ikaba itahanakana icyaha cyo kuyobya amafaranga kuri konti itari yo ahubwo ikaba yarajuriye ivuga ko uwayireze atabifitiye ububasha.

Hari n’ibindi byinshi uyu muryango uvuga ko washavujwe nabyo, gusa ubu bakaba noneho barembejwe n’uko bari no mu gihirahiro kuko batanze ikirego mu ishami rya Polisi rishinzwe Iperereza (CID) barega umugore waguze inzu yabo mu cyamunara mu buryo bw’amanyanga, gusa uwo mugore akaba yaranze kwitaba ndetse impapuro zimuhamagaza dufitiye kopi, zasinyweho n’abayobozi b’inzego z’ibanze bavuga ko bamubuze kandi kuva yahamagazwa na telefone yayikuyeho, mu gihe abandi bakomeje kurara ku irembo ry’inzu yabo.

Muri ibi byose ariko bivugwa n’uyu muryango, ikinyamakuru Ukwezi.com ntabwo twabyicaranye, kuko muri izi ngingo zose, enye za mbere twaziganireyeho na Minisitiri w’Ubutabera bw’u Rwanda, Busingye Johnston, agira icyo abivugaho. Yasubije agira ati: "Ministeri y’Ubutabera ntabwo ari urwego rw’ubujurire. Twibanze ku manza zose zabaye, uko zakurikiranye (chronology), imikirize yazo no kuvuga ko ibikorwa byagiye bikorwa byemewe mu rwego rw’amategeko cyangwa bitemewe.

Twirinze kuvuga ku byo umuburanyi uyu n’uyu yaba abona nk’akarengane byaba ibitaragiweho impaka ngo bicibweho imanza mu nkiko, cyangwa ibyagiweho impaka bigacibwaho imanza umuburanyi uyu n’uyu abonamo akarengane.

Ibireba impaka zavutse kubera uko urubanza rwarangijwe nta byinshi twabivuzeho kubera ko byaregewe inkiko. Twavuze gusa ibyakozwe igihe Djumapili yadusabaga ubufasha. Ikindi twagiriye Djumapili na famille ye inama yo kugaragariza inkiko akarengane baba baratewe n’irangiza ry’urubanza zikaba ari zo zibifataho ibyemezo.

Ibika by’Ingingo ya 29 y’Itegeko Nshinga ugaragaza, n’ubwo jye mbona ko ahanini bireba ibibazo by’inshinjabyaha, birakomeye kuko bigamije kurinda uburenganzira bwa muntu. Umuntu wese usanga uburenganzira bwe ahabwa n’iyi ngingo bwarahutajwe yemerewe kubiregera inkiko zikabisuzuma zikabifataho ibyemezo."

KANDA HANO UREBE VIDEOS UTASANGA AHANDI