Umusirikare wo muri Senegal warokoye ubuzima bw’abanyarwanda yashimiwe

Chief Editor | 21-05-2016
Umusirikare wo muri Senegal warokoye ubuzima bw’abanyarwanda yashimiwe

Kuwa Gatatu tariki 18 Gicurasi 2016, Umuryango w’Abibumbye watanze umudari w’ishimwe ku musirikare ukomoka mu gihugu cya Senegal wapfuye amaze kwitangira abanyarwanda benshi yarokoye akabakura mu maboko y’abicanyi.

Captain Mbaye Diagne, ni umwe mu basirikare bari mu Rwanda mu gihe cya Jenoside yakorewe abatutsi mu 1994, akaba akomoka muri Senegal ariko akaba yari mu basirikare bari bashinzwe kubungabunga amahoro icyo gihe bari boherejwe mu Rwanda n’Umuryango w’Abibumbye.

Captain Mbaye Diagne, bivugwa ko yabashije kurokora abanyarwanda bari hagati ya 600 n’1.000, uku gushaka kwitangira abanyarwanda bikaba byaragiye bituma ashyirwaho igitutu cyane n’abicanyi batamushiraga amakenga, kugeza ubwo yaje kwicwa n’igisasu cyamuhitanye mu gitondo cya tariki 31 Gicurasi 1994, nyuma yo kukinyuraho aho cyari giteze, icyo gihe akaba yari mu modoka ye wenyine

Umudari w’uyu musirikare wabaye intwari, watanzwe n’umunyamabanga mukuru w’Umuryango w’Abibumbye, Ban Ki-moon, akaba yarawushyikirije umupfakazi wa nyakwigendera ndetse n’abana yasize. Ubutwari bwe nabwo bwabaye ishema kuri uyu muryango we.

Abakoranye na Captain Diagne, bavuga ko yari umusirikare w’intwari, kuburyo iyo haboneka benshi nka we, Jenoside itari gukoranwa ubukana nk’ubwo yakoranywe kugeza aho abasaga miliyoni bicwa mu mezi atatu.

Iri shimwe uyu musirikare yahawe n’Umuryango w’Abibumbye, rije nyuma y’aho na Leta y’u Rwanda yari yamushimiye ubutwari yagize akitangira abanyarwanda, muri uwo muhango nabwo umugore yasize akaba ari we washyikirijwe iryo shimwe ryatanzwe na Perezida Paul Kagame mu mwaka wa 2010 ubwo hashimirwaga Abarinzi b’igihango.

KANDA HANO UREBE VIDEOS UTASANGA AHANDI