Umwe mu bayobozi b’ishyaka rya Victoire Ingabire yafunzwe azira kugumura abaturage

Chief Editor | 8-09-2016
Umwe mu bayobozi b’ishyaka rya Victoire Ingabire yafunzwe azira kugumura abaturage

Tariki 23 Kanama 2016, nibwo Léonille Gasengayire, umubitsi wungirije w’ishyaka FDU Inkingi rya Victoire Ingabire, yatawe muri yombi ubwo yari ahitwa ku Kivumu mu karere ka Rutsiro mu Ntara y’Uburengerazuba, akurikiranweho icyaha cyo gushaka kugumura no kwangisha abaturage ubutegetsi na gahunda za Leta.

Radiyo Mpuzamahanga y’Abafaransa (RFI), ivuga ko uyu Léonille Gasengayire, umwe mu bayobozi b’ishyaka rya FDU Inkingi kugeza ubu ritaremererwa gukorera mu Rwanda nk’ishyaka ryemewe, yagiye kugumura abaturage abagira inama yo kwigomeka ku butegetsi no kwanga zimwe muri gahunda za Leta.

Umwunganira mu mategeko, Me Anastase Robert Mutagoma, avuga ko ubushinjacyaha bushingira ku buhamya bw’abatangabuhamya icyenda bamushinja ko tariki 21 na 22 Kanama 2016, yakoresheje amanama n’abaturage aho yanengaga ubutegetsi bw’u Rwanda, anasaba abaturage kwamagana politiki ijyanye n’ingurane z’imitungo, nk’aho Leta iha abaturage ingurane z’ubutaka bwabo mu gihe bugiye gushyirwamo imihanda cyangwa ibindi bikorwa remezo.

Me Anastase Robert Mutagoma wunganira Léonille Gasengayire mu by’amategeko ariko we ibi arabihakana, akavuga ko umukiliya we atigeze yitabira amanama nk’ayo kandi ko yari yagiye mu Ntara y’Uburengerazuba gusura umuryango we. Undi uhakana ibi, ni uwungirije Victoire Ingabire ku buyobozi bw’iri shyaka, uwo akaba ari Boniface Twagirimana uvuga ko ari uburyo bwo gutera ubwoba abatavuga rumwe n’ubutegetsi.

Ku rundi ruhande ariko, Faustin Nkusi, umuvugizi w’Ubushinjacyaha bw’u Rwanda avuga ko itabwa muri yombi rya Léonille Gasengayire ntaho rihuriye na politiki, iperereza rikaba ririmo gukorwa kuri ibi byaha akurikiranweho.

Ingabire Victoire Umuhoza uyobora ishyaka FDU Inkingi, afungiye muri gereza nkuru ya Kigali izwi nka 1930 kuva muri 2010, akaba yarakatiwe gufungwa imyaka 15 azira ingengabitekerezo ya jenoside, gushaka guhungabanya umutekano w’igihugu no gufatanya n’imitwe y’iterabwoba.

KANDA HANO UREBE VIDEOS UTASANGA AHANDI