Umwunganizi wa Victoire Ingabire yatetse imitwe ageze mu Rwanda baramushwishwiburiza

Chief Editor | 23-05-2016
Umwunganizi wa Victoire Ingabire yatetse imitwe ageze mu Rwanda baramushwishwiburiza

Umugore usanzwe yunganira mu mategeko Victoire Ingabire ufungiye mu Rwanda nyuma yo guhamwa n’ibyaha byo kugambanira igihugu agamije kukibuza umudendezo no kurema umutwe w’abagizi ba nabi, yaje mu Rwanda yigize umukerarugendo imigambi ye iramupfubana.

Caroline Buisman, umuholandikazi wari usanzwe yunganira mu mategeko Victoire Ingabire ufungiye muri gereza nkuru ya Kigali izwi nka 1930 kuva mu mwaka wa 2010, yaje mu Rwanda yigize umukerarugendo ariko agamije gusura uyu mugore aho afungiwe muri gereza, nyuma abayobozi b’u Rwanda bamwereka ko atubahirije ibisabwa kandi ashaka gukora ibinyuranyije n’amategeko.

Caroline Buisman ubwe yemereye Radio mpuzamahanga y’Abafaransa, RFI, ko nyuma yo kwandikira u Rwanda asaba Visa yo kuza gusura umukiliya we Ingabire Victoire, yabonye batamusubije akiga amayeri yo gusaba Visa y’ubukerarugendo, akiyibona akaza mu Rwanda yigize umukerarugendo nyamara afite indi gahunda yashakaga kugeraho.

Ubwo yageraga mu Rwanda, yahise avuga ko ari uwunganira Ingabire Victoire mu mategeko ndetse asaba ko yakwemererwa kujya kumusura, ariko bamusaba uruhushya rwa Minisiteri y’Ububanyi n’Amahanga, ariko nyuma yo kutabyumva no kutabyubahiriza, yangirwa gusura umukiliya we kuko ibyangombwa yari afite nk’umunyamahanga byerekanaga ko nta kindi cyamuzanye kitari ubukerarugendo.

N’ubwo ariko yiyemerera ko yari yize amayeri yo kwaka ibyangombwa by’ubukerarugendo atari bwo bumuzanye mu Rwanda, uyu mugore yabwiye RFI ko yarenganyijwe akirukanwa akanangirwa gusura umukiliya we, kuwa Kane tariki 19 Gicurasi 2016 akaba ari bwo yasubiye iwabo mu Buholandi.

KANDA HANO UREBE VIDEOS UTASANGA AHANDI