AMAKURU

UKWEZI

Urugamba Rucagu yarwanye nyuma yo kugirwa umuyobozi bamukuye mu ngunguru

Urugamba Rucagu yarwanye nyuma yo kugirwa umuyobozi bamukuye mu ngunguru
7-07-2016 | By Chief Editor | Yasomwe n'abantu 15034 | Ibitekerezo 10

Rucagu Boniface, ni umunyepolitiki wakoze imirimo inyuranye mu Rwanda, ndetse wabaye umuyobozi ku ngoma zitandukanye z’abaperezida bayoboye u Rwanda. By’umwihariko nyuma ya Jenoside yakorewe abatutsi, Rucagu yarwanye urugamba rukomeye rwo kuyobora igice cyarimo abacengezi n’abafite ingengabitekerezo y’ivangura, nyuma y’uko abayobozi ba Leta y’ubumwe bamusangaga aho yacuruzaga ingunguru mu Gakinjiro, akagirwa perefe w’icyahoze ari Ruhengeri.

Rucagu Boniface yakunze kurangwa mu myanya ya politiki myinshi, guhera mbere ya Jenoside yakorewe Abatutsi, dore ko guhera mu 1984 kugeza mu 1994 yari umudepite mu Nteko Ishinga Amategeko y’u Rwanda. Nyuma ya Jenoside yagiye agirirwa icyizere na Perezida Kagame, akaba yarabaye Perefe w’icyahoze ari Ruhengeri ndetse aza no kuba Guverineri w’Intara y’Amajyaruguru. Ubu ni umuyobozi mukuru w’Itorero ry’igihugu.

Mu kiganiro cyihariye yagiranye n’ikinyamakuru Ukwezi.com, Rucagu Boniface yasobanuye uburyo nyuma ya Jenoside yakorewe abatutsi yagizwe umuyobozi mu Ntara y’Amajyaruguru, ariko abaturage b’iyi ntara bakaba baramugoye cyane kuko abenshi batari banishimiye ko Inkotanyi zabohoje u Rwanda, bitewe n’ingengabitekerezo y’ivangura yari yarabacengeye, ikindi hakaba hari umubare munini w’abacengezi.

JPEG - 114.4 kb

Rucagu ati: "Byari bigoye kugirango bahinduke, cyane cyane ko bari bamaze imyaka irenga 35 kuva mu 1959, barayobowe mu nzira y’amacakubiri. Iyo myaka rero yari yarabubatsemo ingengabitekerezo y’ubumwe bw’abahutu, ubwo rero iyo ngengabitekerezo y’ubumwe bw’abahutu inyuranye n’ingengabitekerezo y’ubumwe bw’abanyarwanda. Ingengabitekerezo y’ubumwe bw’abahutu, ni ivangura."

Rucagu ariko avuga ko uburyo abaturage bari basanzwe bamuzi ndetse no kuba barabonaga nawe ubwe yagiriwe icyizere agahabwa kuyobora, byamufashije mu rugamba rwo kubahindura kuko byakomeje kubereka ko u Rwanda rwabonye noneho ubutegetsi butavangura. Ibyo yabwiraga abaturage byose, we ubwe yahitaga yitangaho urugero.

Aha Rucagu yagize ati: "Nabasobanuriraga ko Leta ari iy’ubumwe bw’abanyarwanda bose, n’ikimenyimenyi nanjye nkitangaho urugero. Nti muranzi ko nabaye muri Leta zabanje, ariko iyi Leta ntiheza, ntivangura n’ikimenyimenyi nanjye nyirimo. Ahongaho bakarebana bakavuga bati ariko ubanza byabintu ari byo koko. Icya kabiri kuba nari narabaye umudepite mu Ruhengeri manda ebyiri kandi abaturage bantora ndetse bakantora cyane birenze uko batoraga abandi, noneho nkababwira nti njyewe muranzi ntabwo nabifuriza ikibi, aha mbayoboye ni heza niho hazubaka igihugu cyacu. Noneho bakavuga bati ariko ubwo Rucagu abitubwiye kandi Rucagu turamuzi ntabeshya, aha hantu atuyobora niho."

Gusa Rucagu Boniface, ashimangira ko nawe ubwe kuba yaragiriwe icyizere byamutunguye ndetse akabyumva yicururiza ingunguru mu Gakinjiro, kuburyo yanze kwemera ko ari we akamara igihe atarajya ku kazi yari yahawe yumva ko ari undi bitiranwa.

JPEG - 81.4 kb

Rucagu ati: "Ndakubwiza ukuri ntabwo nari mbyiteze, ntabwo nari narigeze ngira amahirwe yo kubonana n’Inkotanyi wenda ngo ndiherera tunamenyane tugire ibyo tuganiraho, gusa nsigara muri iki gihugu nasigaye mvuga nti nzaregwa ko nabaye mu bayobozi babanje kandi bagize uruhare rwo gukora Jenoside, nibandega nzatsinda kuko niyizi n’abaturage bo mu majyaruguru bari bazi ko ntawe nahemukiye. Nintsinda rero nkagaragaza ko ibya Jenoside nta ruhare nabigizemo, nzaba umuturage nk’abandi mpinge, norore, ntange umuganda, mbe intangarugero mu kumvira no kuyoboka ubuyobozi bwari bugiyeho. Ngayo amahirwe nari ntegereje... Bangirira icyizere, icyo gihe nari narihangiye imirimo, nacuruzaga ingunguru mu Gakinjiro. Ababimbwiye bansanze mu rugo, ariko bari baranshyizeho nanjye ndabyumva kuri radiyo ariko ngakeka nti ntabwo ari njye, ni umuntu twitiranwa. Njyewe baba bampamagaye biturutse kwande? Noneho abaje kundeba barambwira bati wowe ko utagiye ku kazi? Ndababwira nti nkavuyeho, mvuye mu Gakinjiro mvuye kwicururiza ingunguru, ubu nje kuruhuka rwose akanjye ndakarangije. Bati ntabwo wamenye ko wabaye perefe? Ntabwo wumvise radiyo ivuga ko Perefe wa Ruhengeri ari wowe? Nti ibyo narabyumvise, ariko ntabwo namenye ko ari njye, nagizengo ni uwo twitiranwa... Ntabwo nabyiyumvagamo, ntabwo nari mbitegereje. Barambwira bati si wowe wabaye umudepite mu Ruhengeri? Ndikiriza bati rero itunganye, ntabwo tugusiga ahangaha turakujyana."

Nyuma yo kugirwa umuyobozi, Rucagu yagiye yegera abaturage bo mu Majyaruguru mu gice cyari kirimo umubare mubibi w’abacengezi, akumvisha rubanda ko abarimo gukora ibyo bisenyera kandi ko batuje bagashyira intwaro hasi ntacyo baba ndetse bamwe bazashyirwa mu ngabo z’igihugu, ibi abaturage bakaba barabanje kubifata nko kubashuka no kubagambanira ariko Rucagu akomeza kurwana urugamba rwo kubahindura, buhoro buhoro bagenda babyumva.


Tanga Igitekerezo
Ibitekerezo 10
ak Kuya 11-12-2016

Ikibazo nuko ucinya inkoro cyane,gs uzi kwishakira umugati,kugeza ubwo uvuga ngo woza ubwonko abantu?ntamuntu ukwiye kozwa ubwonko ni ijambo ribi,nukuvugako abantu ubahindura nka robots akabashyiramo ibyo wishakiye byaba bibi cg byiza??

andre Kuya 11-12-2016

Rata wwe bakureke uzihahira.mbese urinyamujya iyo bigiye,uzikwishakira ibirayi ngo urebeko bwacya kaburimbo

Peace Kuya 11-12-2016

Kbsa uyu yatubera urugero rwo kumvira ubuyobozi

coco Kuya 19-09-2016

umva uyu musaza yararukoreye kabisa ni intore!!!!twiheshe agaciro turebera ku bayobozi beza!!

ANITHA Kuya 15-07-2016

yewe niba ibyo uvuga koko biba biguturutse ku mutima uri intangarugero pe,iyo utsinzwe burya urayamanika ukayoboka ubuyobozi buriho cyane ko nta mahitamo uba ufite...wa musaza we ureba kure nabandi bajye bumviraho ubuyobozi bwa Kagame ntawe utabushima dore ntako baba batabagize rwose...

habyarimana moussa Kuya 8-07-2016

sasa rucagu FDLR mbona BAZUNGU FRANCE EUROPE TULIKUWA TUNAJUWA KAMA DEOCRAS IKO NANGUVU IVI BANASEMA KAMA IME KWISHA MUDA EXPIRE NA SISI RDC KISANGANI KAZI NIKIDOGO TUNAJARIBU BUJUMBURA WEYE UNAWONA NAMUNA GANI UMWAMBIYE IBINGIRA FREDY ATUTAFUTIYE CARGEUR YA DEMOCRAS DUBAI CHINA JAPON UTUTAFUTIYE CHARGEUR YA KUTUMIYA KU DEMOCRAS YETU TUWE WANYA RWANDA APA IDENTITE REFUGIERS NA TURUDIYE RWANDA

PACI Kuya 7-07-2016

UMVA AMAHAME HANO nzaba umuturage nk’abandi mpinge, norore, ntange umuganda, mbe intangarugero mu kumvira no kuyoboka ubuyobozi bwari bugiyeho. NDAKWEMERA MUSAZA AYO NIYO MAHAME UMUTURAGE WESE YAKAGOMBYE KUGIRA UBUNDI AKARAMA MU GIHUGU CYE PE

PACI Kuya 7-07-2016

UMVA AMAHAME HANO nzaba umuturage nk’abandi mpinge, norore, ntange umuganda, mbe intangarugero mu kumvira no kuyoboka ubuyobozi bwari bugiyeho. NDAKWEMERA MUSAZA AYO NIYO MAHAME UMUTURAGE WESE YAKAGOMBYE KUGIRA UBUNDI AKARAMA MU GIHUGU CYE PE

VAVA Kuya 7-07-2016

MUBANTU NEMERA NANJYE MURIYISI NA RUCAGU NDAMWEMERA CYANE NUMUYOBOZI MWIZA UZI KUBAHA UTIYEMERA UTIRARA

framignon Kuya 7-07-2016

turakwemera mzee

IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA