Urukiko rw’ikirenga muri Afurika y’Epfo rwasabwe ko Gen Kayumba Nyamwasa ahambirizwa

Chief Editor | 17-06-2016
Urukiko rw’ikirenga muri Afurika y’Epfo rwasabwe ko Gen Kayumba Nyamwasa ahambirizwa

Itsinda ry’abahagarariye impunzi n’abimukira muri Afurika y’Epfo, ryatanze ikirego mu rukiko rw’ikirenga, rikomeza gusaba Leta ko yatesha agaciro ibyangombwa by’ubuhunzi byahawe General Kayumba Faustin Nyamwasa, kubera ibyaha byibasiye ikiremwamuntu akurikiranyweho.

Nk’uko ikinyamakuru Times Live cyo muri iki gihugu cyabitangaje, iri shyirahamwe rivuga ko rishaka guharanira ibi, kuko ritifuza ko igihugu cya Afurika y’Epfo cyaba icumbi abanyabyaha bahungiramo bakajya kwidegembya. Kuregera urukiko rw’ikirenga kandi, bije nyuma y’uko urukiko rukuru rwa Pretoria rwari rwanze iki cyifuzo.

Iri tsinda rigira riti: "Nyamwasa ashinjwa ibyaha by’intambara yakoze mu Rwanda no muri Repubulika Iharanira Demokarasi ya Kongo, ibyo bikaba ari ibyaha yakoze ubwo yari umusirikare w’umugenerali mu ngabo z’u Rwanda, ubu akaba ashakishwa n’inkiko zo mu Bufaransa ngo aburanishwe kuri ibyo byaha mpuzamahanga. General Nyamwasa yahawe ibyangombwa by’ubuhunzi b’abayobozi ba Afurika y’Epfo, birengagije ko amategeko atemerera abakoze ibyaha by’intambara guhabwa ubuhunzi."

Urukiko rukuru rwa Pretoria, rwari rwagaragaje ko Nyamwasa yahawe ibyangombwa by’ubuhunzi bitewe n’uko abayobozi b’iki kihugu bari babonye ko ahigwa na Leta y’u Rwanda, bakanavuga ko iri tsinda rihagarariye impunzi n’abimukira ritigeze rigaragaza ibimenyetso bifatika byerekana ko ibyaha ashinjwa yaba yarabikoze.

Iri tsinda rivuga ko Afurika y’Epfo ikomeje kuba ahantu h’umudendezo ku bakekwaho ibyaha bikomeye kandi ibi bikaba bidashobora gukomeza. Rivuga ko ubuhunzi ari ubw’abantu bahunga abashaka kubagirira nabi, atari ubw’abahunga ubutabera kubera ibyaha bakoze.

KANDA HANO UREBE VIDEOS UTASANGA AHANDI