Uzita ’Ibiryabarezi’ abanyeshuri bashya muri Kaminuza azahura n’akaga gakomeye

Chief Editor | 22-09-2016
Uzita ’Ibiryabarezi’ abanyeshuri bashya muri Kaminuza azahura n’akaga gakomeye

Dr Usta Kayitesi, aha yari mu itorero hamwe n’abandi bayobozi muri Kaminuza

Hashize imyaka myinshi, abanyeshuri bashya bajya gutangira Kaminuza mu Rwanda bagenerwa izina, cyane cyane muri Kaminuza za Leta. Hari hashize iminsi bivugwa ko ab’uyu mwaka bazabita ’Ibiryabarezi’ ariko umuyobozi w’ishami rya Kaminuza y’u Rwanda riri i Huye, yavuze ko uzabitinyuka ashobora guhura n’akaga, agahabwa ibihano birimo no kwirukanwa.

Ibi byatangajwe kuri uyu wa Gatatu tariki 21 Nzeri 2016, mu muhango wo gusoza icyumweru cyagenewe kumenyereza abanyeshuri bashya muri Kaminuza. Dr Usta Kayitesi uyobora ishami rya Kaminuza y’u Rwanda rya Huye, yavuze ko bidakwiye kwita abanyeshuri amazina abatesha agaciro.

Dr Usta Kayitesi yavuze ko yiteguye kugira abanyeshuri yirukana bakamara umwaka wose batiga bazira kwita bagenzi babo bashya ’Ibiryabarezi’, kuko ngo ari izina ritesha abantu agaciro mu gihe n’ingagi zishakirwa amazina meza azihesha ishema.

Kwita izina abanyeshuri bashya muri Kaminuza bimaze igihe kirekire bikorwa, aho izina ritangwa hagendewe ku kintu kirimo kuvugwa cyane muri iyo minsi. Hari abiswe ’Nyakatsi’ mu gihe hariho gahunda yo kurandura inzu za nyakatsi, hari abiswe Manoyinanga, Ibigarasha n’andi mazina y’ibintu byabaga birimo kuvugwaho cyane.

Ibiryabarezi naryo ni ijambo ryari rimaze iminsi rikoreshwa cyane mu Rwanda, rikaba ryarabanje guhabwa imashini zikorerwaho urusimbi rw’imikino y’amahirwe, nyuma rihabwa indaya ariko ugasanga n’umuntu wese ushaka kuvuga ikintu cyamuhombeje amafaranga aragiha izina ry’ikiryabarezi.

KANDA HANO UREBE VIDEOS UTASANGA AHANDI