Nyuma yo gukuraho impapuro zifata abayobozi bakuru 40, u Rwanda na Espagne bibanye neza

Chief Editor | 10-05-2016
Nyuma yo gukuraho impapuro zifata abayobozi bakuru 40, u Rwanda na Espagne bibanye neza

Mu mwaka wa 2008, umucamanza wo mu gihugu cya Espagne yashyize hanze impapuro zita muri yombi abanyarwanda bagera kuri 40, biganjemo abari mu buyobozi bukuru bw’u Rwanda ndetse n’abahoze muri ubu buyobozi, kandi bagize uruhare mu guhagarika ubwicanyi bwa Jenoside yakorewe abatutsi. Ibi byagiye bituma umubano hagati y’u Rwanda na Espagne umera nabi, ariko ubu umubano urazira amakemwa.

Hagati mu mwaka ushize wa 2015, Lt Gen Karenzi Karake wari ukurikiye ibiro by’iperereza mu Rwanda, yafatiwe mu gihugu cy’u Bwongereza atabwa muri yombi, hagendewe kuri izi mpapuro z’umucamanza wo muri Espagne witwa Fernando Andreu Merelles, ibi bikaba byarababaje cyane Leta y’u Rwanda, hirya no hino mu gihugu abaturage bakora n’imyigaragambyo bagaragaza ko batishimiye iki gikorwa cyo kwibasira bamwe mu bahagaritse Jenoside yakorewe abatutsi mu 1994.

Nyuma y’ifungurwa rya Lt Gen Karenzi Karake, tariki 10 Nzeri 2015 nibwo Urukiko rw’Ikirenga rwo mu gihugu cya Espagne rwatesheje agaciro izo mpapuro zari zashyiriweho guta muri yombi abayobozi bakuru bagare kuri 40 b’abanyarwanda, kuva icyo gihe umubano utangira kumera neza hagati y’ibihugu byombi.

Kuri uyu wa Mbere tariki 9 Gicurasi 2016, nibwo Perezida wa Repubulika y’u Rwanda, Paul Kagame, yakiriye impapuro zemerera abambasaderi bagera kuri batanu guhagararira ibihugu byabo mu Rwanda, muri abo hakaba harimo n’uwo Espagne witwa Felix Costales Artieda, ugomba kuba ambasaderi wa Espagne mu Rwanda ariko akagira icyicaro i Dar-Es-Salaam muri Tanzania.

Ubwo yaganiraga n’abanyamakuru, Felix Costales Artieda yatangaje ko umubano w’u Rwanda wagiye urangwa n’agatotsi bitewe ahanini n’izi mpapuro zari zashyiriweho guta muri yombi abayobozi bakuru b’u Rwanda, ariko ubu bikaba byararangiye kandi umubano w’ibihugu byombi ukaba uzira agatotsi.

Uyu mugabo Felix Costales Artieda , yasobanuye ko impapuro zita muri yombi abayobozi bakuru b’u Rwanda zari zashyizweho hashingiwe ku rupfu rw’ababikira bakomoka muri Espagne baguye muri Repubulika Iharanira Demokarasi ya Kongo, ariko ibi bikaba byararangiye ndetse ibihugu byombi byishimiye kugirana umubano mwiza ushingiye ku hazaza heza.

KANDA HANO UREBE VIDEOS UTASANGA AHANDI