Mu turere 14, habaruwe imiryango 6,914 yazimye Jenoside isiga nta wo kubara inkuru

Chief Editor | 21-05-2016
Mu turere 14, habaruwe imiryango 6,914 yazimye Jenoside isiga nta wo kubara inkuru

Kuri uyu wa 21 Gicurasi 2016; ku Rwibutso rwa Jenoside rwa Kigali ku Gisozi; Umuryango w’Abacitse ku Icumu Barangije Amashuri Makuru na Kaminuza (GAERG) guhera saa kumi z’umugoroba wibutse imiryango yazimye mu gihe cya Jenoside yakorewe abatutsi.

Kuvuga ko umuryango wazimye ni ukuvuga ko nta muntu n’umwe wasigaye muri urwo rugo, ababyeyi n’abana babo bose barishwe mu gihe cya Jenoside yakorewe Abatutsi; ntihasigara n’umwe wo kubara inkuru muri uwo muryango.

Kugeza ubu hamaze kubarurwa imiryango 6,914 yazimye yari igizwe n’abantu 30,618. Iri barura rimaze gukorwa mu turere 14, intego ikaba ari ukugera mu turere 16 dusigaye.

Umuyobozi wa GAERG, Charles Habonimana avuga ko kuba hari imiryango yazimye bigaragaza ko Jenoside yateguwe ndetse igakoranwa ubukana bukomeye hagamijwe kurimbura Abatutsi.

Charles Habonimana yagize ati “Imiryango yazimye ni ikimenyetso kigaragaza ko Jenoside yateguwe ndetse igashyingwa mu bikorwa hagamijwe kurimbura Abatutsi. Twibuka imiryango yazimye duharanira ko itazazima. Kubibuka ni inshingano zacu kandi ni igihango dufitanye nabo, ntibazazima twararokotse”.

Avuga ku nsanganyamatsiko yahariwe Kwibuka ku nshuro ya 22 Jenoside yakorewe Abatutsi, Perezida wa GAERG yagize ati “Turiho ngo twibuke, tuzirikane kandi tuvuge amateka y’Imiryango Yazimye. Gushakisha no kubika amakuru ku Miryango Yazimye ni ikindi kimenyetso cyo kurwanya abahakana Jenoside kandi nk’urubyiruko dukwiye kubishyiramo imbaraga mu rwego rwo gutegura ahazaza heza”.

Kuri iyi nshuro ya munani, Kwibuka Imiryango Yazimye, byabereye ku Rwibutso rwa Jenoside rwa Kigali ahashyinguye inzirakarengane zazize Jenoside yakorewe Abatutsi zisaga 250.000.

KANDA HANO UREBE VIDEOS UTASANGA AHANDI