Ngororero: Umusore yikebye ubugabo abukuraho nyuma yo kubuzwa kwiyahura

Chief Editor | 2-06-2016
Ngororero: Umusore yikebye ubugabo abukuraho nyuma yo kubuzwa kwiyahura

Umusore w’imyaka 26 wo mu mudugudu wa Kibingo mu kagali ka Rugogwe Umurenge wa Muhororo mu karere ka Ngororero mu mpera z’icyumweru gishize yafatiwe mu cyuho ari kugerageza kwiyahura akoresheje akagozi baramutesha maze nyuma gato ahita akoresha urwembe yikata amabya (udusabo tw’intanga) ayavanaho.

Uyu musore utarabyara na rimwe, ngo nyuma yo kubuzwa kwiyahura yagiye mu nzu afata urwembe yikata udusabo tw’intanga ngo kuko yari yarumvise ko iyo umugabo acitse ubugabo bwe apfa.

Uyu musore ubu arwariye mu bitaro bya CHUK nyuma yo kuvanwa ku kigo nderabuzima cy’iwabo avirirana amaraso gukama byanze.

Kimwe mu bitangaje ni abamuzanye kwa muganga baje bitwaje agapfunyika karimo turiya dusabo yivanyeho, bibaza ko hari ikizere ko batumusubirizaho.

Aho arwariye araganira, gusa bivugwa ko yaba afite ibibazo mu mutwe.

Ubwe yabwiye urubuga Umuseke dukesha iyi nkuru ati “Bamaze kumbuza (kwiyahura) nahise njya ku ruhande mfata akembe ndabirangiza (yikata amabya).”

Iyo muganira anyuzamo akanatebya ati “Uwibabaje (uwiyishe) ntaririrwa, ariko ninkira shitani ntazongera kunshuka kandi nzakira vuba kuko amaraso yavaga yatangiye gukama.”

Uyu musore wari usanzwe ari umupagasi avuga ko ngo ari shitani wamuteye ibyo yakoze kubera ibibazo yari afite mu kazi ke.

Uyu ubu ari kuvurwa igikomere cy’aho yavanye turiya dusabo, ngo birashoboka ko yakira, kandi yakira neza akaba yanabasha gukora imibonano mpuzabitsina ariko ntashoboka kubyara kuko yivanyeho udusabo tw’intangangabo.

KANDA HANO UREBE VIDEOS UTASANGA AHANDI