Ijambo ry’Imana: Mbese ujya ufata umwanya ukazirikana uwaguhinduriye amateka?

Chief Editor | 26-06-2016
Ijambo ry’Imana: Mbese ujya ufata umwanya ukazirikana uwaguhinduriye amateka?

Kuva Isi yaremwa kugeza aya magingo ubuzima bwacu bugenda bugaragaramo imbaraga zikomeye n’ibitangaza by’Imana bitabarika, gusa kubw’imibereho ya muntu hari igihe bigera aho tugasa nk’ababyibagiwe; aka ya ndirimbo ngo "tukabifata nk’ibisanzwe tukumva ko byari bikwiye kubaho..." nkaho byari itegeko ko ari twe gusa twagombaga kugirirwa neza.

Nyamara birakwiye ko umuntu agira umwihariko wo guhindukiza amaso akibuka ibyo Imana yamukoreye, nka kimwe mu byamugirira akamaro kuko bavuga ngo utazi iyo ava ntamenya iyo ajya.

Ntawashidikanya ko Imana yacu yatubereye umwungeri mwiza, kuko yaturinze mu bikomeye bitandukanye, yabaye mu ruhande rwacu turabibona: Ibuka imfu zaguciye imbere zari kuguhitana, inzara yari itoroshye yabayeho wowe ubona ibyo kurya, hari imyaka yabayeho utazi koga icyo ari cyo, kwambara no kwisiga bitabarizwa iwawe ariko ubu nawe urambara ukaberwa, ukajya mu bandi! Waba ujya wibuka uwakoze ibyo?

Benshi batagiraga aho kwikinga imbeho none ubu Uwiteka Imana yabahaye amazu yo kubamo, umuryango utarabagamo umuntu n’umwe wize none wowe amashuri urayarangije, ibuka cya gihe urwara amavunja ubukene ari twibanire mu muryango w’iwanyu ukumva gupfa bikurutiye kubaho, bamwe bambara inkweto ku minsi mikuru gusa, nyamara ubu Imana yahinduye amateka, uwakureba uyu munsi ntiyamenya ko yari wowe.

Ujya ufata akanya ko kubizirikana? Iyo ubyibutse ukora iki?
Bavandimwe kwibukiranya ibi byose ntabwo ari ukuzana ibyo gucyurirana (nkuko bamwe bashobora kubifata batyo) ahubwo ni ukwibuka imirimo ikomeye itangaje Imana yakoze ntacyo iduca ari urukundo rwayo gusa, kuko aho yadukuye si aho kwifuzwa no kwifuriza undi wese, twari tumeze nabi, twari dushize dusa n’abatariho, twari abo gusuzugurwa nyamara Imana y’inyembabazi n’ibambe iraturengera.

Twajyaga ducurwaho imigani itari imwe nyamara Imana ni umubyeyi ntabwo yashimye ko tubabara iteka. Dore ubu nawe urabasha kujya mu bandi ukakirwa bati : "dore nyakubahwa runaka nimumwakire bwangu." Iyo ubyibutse ukora iki?

Ku rundi ruhande, birashoboka ko hari utaranyuze mu buzima bugoye nkubwo tuvuga akumva ibi byose ari nk’inkuru zihita gusa bitamureba, ariko zirikana yuko nawe ukwiye gushimira Imana kuko nta na kimwe watanze ngo uvukire aheza, abakuriye muri buriya buzima bubi tuvuga si uko batutse Imana ahubwo ni uko igena byose uko ishaka. Bibiliya iravuga ngo “mu bibi no mu byiza duhora dushima.” Kwibuka ibi byose bikwiye kuduha isomo ryo kumva ko ntawe bitageraho kandi nta n’uwo bitavaho.

Birashoboka ko umuntu yakwibagirwa cyangwa se yabona abandi bugarijwe n’ubuzima bubi nk’ubwo akabafata nk’abantu batuzuye bafite ikibazo mu mitwe yabo. Oya sigaho!
Ahubwo ubaye intwari, watanga imbaraga zawe kugira ngo byibuze ugire umuntu umwe urokora umukure muri buriya buzima. Ahari byagusaba amikoro, byagusaba se umwanya wawe, cyangwa se n’ibindi ariko ibaze nawe iyo hatagira uwitanga ngo ukurwe muri bwa buzima wibutse wari urimo? Uba uri uwande? Uba umeze ute? Uba uri he? Usa ute?

Haguruka none ushimire Imana yagukoreye ibyo byose wibuka byari bigukomereye, ushime Imana ubinyujije muri mwene wanyu, umuturanyi wawe, umwene-gihugu mugenzi wawe nubwo waba utamuzi cyangwa ikiremwa-muntu muri rusange ubona agowe muri iyi minsi, kuko bitabaye uko byaba akawa mugani ngo ushize impumu yibagirwa icyamwirukansaga. Ntawe umenya uko ejo hazaba hameze.

Zirikana ko kuba warabiciyemo ukaba umeze neza, ntaho byagiye, ejo n’ejo bundi byagaruka kuko kuba ukiri muri iyi si ihindagurika buri kanya, ibyo byonyine birahagije ngo ube ukiri umukandinda wo gusubira muri bwa buzima wahozemo isaha iyari yo yose.

Ariko byibuze kora icyatuma wibutsa Imana ugeze mu bihe bibi, uti: "Mana ibuka ko nanjye nagize umumaro mu gihe cyanjye, ubwo nari mfite uko meze nafashije runaka na runaka, Mana dore nigomwe ibyo kurya mfasha wa mukene duturanye aburaye, Mana nyibukira yuko nahaye umwambaro wa mukene dusengana... Mana nyibuka."

Imana yacu ni nziza ntikeneye ko tuyiha ingurane ingana n’ibyiza idukorera, cyane cyane ko tutanabibona, ahubwo yifuza ko tutarya ngo nitumara kwijuta twibagirwe aho yatuvanye cyangwa twirengagize abakiriyo.

Ibuka Mwene Dara, we kwibagirwa aho wavuye, ushime Uwiteka Imana Ihoraho yaguhuhiye mu ngata uyu munsi ukaba utakiburara nka mbere, ubasha kujya mu bandi wavuga noneho hakaboneka uwakumva, ukaba uri uko uri. Jya wirinda kumva ko ari kubw’imbaraga n’ubuhanga byawe, we kwishuka ko ari uko uzi gushakisha kurusha abandi ahubwo gusa ni ukubera Ubuntu bw’Imana yonyine. Imana ishimwe.

Ijambo ry’Imana muritegurirwa na Rejoice Africa Ministries.

KANDA HANO UREBE VIDEOS UTASANGA AHANDI