Umupadiri w’umuzungu wakoreraga mu Rwanda kuva mu gihe cy’ubukoloni yatabarutse

Chief Editor | 12-07-2016
Umupadiri w’umuzungu wakoreraga mu Rwanda kuva mu gihe cy’ubukoloni yatabarutse

Padiri Hervé Lunden uri mu bapadiri bera bari bamaze igihe kirekire mu Rwanda ndetse adidibuza neza ururimi rw’Ikinyarwanda, yatabarutse afite imyaka 84 y’amavuko, nyuma y’imyaka 58 ageze mu Rwanda.

Padiri Hervé Lunden wavukiye i Buruseri mu Bubiligi tariki 17 Mata 1932, ari mu bapadiri baje mu Rwanda cyera mu gihe cy’ubukoroni, dore ko tariki 18 Ugushyingo 1958 ari bwo yageze muri Paruwasi ya Kabgayi, agahita ajya kuyobora Paruwasi ya Nyumba hafi ya Seminari Nkuru ya Nyakibanda. Yagumye mu Rwanda imyaka myinshi, akomeza gufasha abakiristu gaturika mu bice by’amajyepfo y’u Rwanda.

Mu gihe cya Jenoside yakorewe abatutsi mu Rwanda, Padiri Hervé Lunden yahunganye n’abandi bajya i Bukavu mu cyahoze ari Zaire, aho yageze agakomeza kwigisha ibijyanye n’imyemerere ya Kiliziya Gaturika. Yahavuye asubira mu Bubiligi, ariko aza kugaruka mu Rwanda mu 1996, ahita ajya gukorera mu cyahoze ari Gikongoro, aho yigishaga iyobokamana mu bigo by’amashuri kandi mu rurimi rw’Ikinyarwanda. Urugero ni nko mu kigo cya Collège Protestant de Kigeme.

Kubera igihe yari amaze mu Rwanda, uretse kuvuga neza ururimi rw’ikinyarwanda, yari anazi ibijyanye n’imihango gakondo y’abanyarwanda nko guterekera, ibya Nyabingi na Ryangombe n’ibindi byatumaga abasha kwigisha neza iyobokamana asobanukiwe umuco w’abo yigisha.

KANDA HANO UREBE VIDEOS UTASANGA AHANDI