Gushinjanya amarozi, ubusambanyi... biraganisha Apotre Bizimana n’umugore we kuri gatanya

Chief Editor | 9-05-2016
Gushinjanya amarozi, ubusambanyi... biraganisha Apotre Bizimana n’umugore we kuri gatanya

Nyuma y’intonganya, kurwanira imitungo, gushinjanya ubugambanyi, gushwanira mu bayoboke babo, gusenya urusengero n’ibindi byagiye biteza umwuka mubi hagati ya Apotre Liliane Mukabadege n’umugabo we Apotre Bizimana Ibrahim, kuri uyu wa Mbere tariki 9 Gicurasi 2016, nibwo ku rukiko rw’ibanze rwa Nyambirambo hakomeje ibijyanye n’urubanza bareganyemo basaba gatanya, hakaba hari hategerejwe imyanzuro igomba kuvamo ariko kuko hari uruhande rwagaragaje ibindi bimenyetso bishya bizashingirwaho mu rukiko, urubanza rwasubitswe rwimurirwa kuwa mbere utaha tariki 16 Gicurasi 2016.

Apotre Liliane Mukabadege azwi nk’umuhanuzi, umukozi w’Imana akaba n’umuyobozi w’urusengero Umusozi w’Ibyiringiro ruherereye ku Kimisagara mu mujyi wa Kigali ahazwi nko ku Ntaraga, gusa rukaba rufite andi mashami harimo n’ishami riherereye i Runda mu karere ka Kamonyi. Uyu Apotre Mukabadege Liliane yashakanye na Apotre Bizimana Ibrahim, uyu akaba yaranahoze ayobora urusengero rw’i Runda ndetse yari anamwungirije ku buyobozi bw’iri torero mu buryo bw’amategeko (Representant Legal).

Ibijyanye n’itorero, imiyoborere yaryo n’imitungo yaryo byagiye biteza umwuka mubi hagati y’aba bavugabutumwa, kugeza ku ntera y’aho hajemo gufungwa no gusenya urusengero ruherereye i Runda mu karere ka Kamonyi. Iby’umubano wabo, iby’itorero ryabo n’umwuka mubi wabaranze, bifite amateka maremare, kugeza aho ubu barimo gushaka gutandukana burundu ndetse hitabajwe inkiko, ari nabyo tugiye kubavira imuzingo muri iyi nkuru.

Si ubwa mbere batanze ikirego ngo batandukane burundu

Tariki ya 3 Gicurasi 2014, uyu mugabo Bizimana Ibrahim yatawe muri yombi akurikiranyweho kunyereza imitungo yo mu itorero rye n’umugore we, ku ishami rya Runda yari anabereye umuyobozi, hanyuma aza gufungurwa ku itariki 19 Gicurasi 2014 bimaze kugaragara ko ibyo aregwa bidafite ishingiro. Amaze gufungurwa haza kubaho kutumvikana hagati ye n’umuyobozi w’itorero ari nawe mugore bashakanye, ndetse uyu Bizimana akaba yaraje gutangaza ko umugore we Liliane Mukabadege ari we wari wamufungishije afatanyije n’abandi bantu bari bakomeye mu itorero. Icyo gihe, umugore yari Bishop naho umugabo ari Reverend, ariko bombi baherutse gushyirwa ku rwego rwo hejuru rw’Intumwa z’Imana (Apotres cyangwa Apostles mu ndimi z’amahanga), mu muhango bimitswemo na Apotre Paul Gitwaza tariki 8 Kanama 2015.

Ubwo umugabo yafungurwaga icyo gihe muri Gicurasi 2014, yahise ajya gutanga ikirego mu rukiko asaba ko bahabwa gatanya agatandukana burundu n’uyu mugore we mu buryo bw’amategeko (Divorce). Kuko bari basanzwe ari abakozi b’Imana, kuba baragiranye ibibazo bikageza aho bashaka gutandukana bapfa imitungo no gushinjanya ubugambanyi, byakuruye umwuka mubi mu itorero ndetse bombi kongera gusubira imbere y’abayoboke babo babwiriza bibabera ikibazo gikomeye, baza gusanga bigiye kubangamira akazi kabo ko kuba abavugabutumwa. Baje gufata icyemezo cyo kwiyunga, maze kuwa mbere tariki 7 Nyakanga 2014 bageza imbere y’urukiko urupapuro rusaba ko ikirego cyo gutandukana cyateshwa agaciro, uru rwandiko tukaba twarabashije no kurubonera kopi.

Ubu nabwo, nyuma y’igihe babana ariko umwuka mubi udasiba kugaragara ukagera no mu bayoboke b’itorero ryabo, ibintu byongeye kuzamba umugabo ashinja umugore guta urugo no kurusahura ndetse banatangiye kugana inkiko ngo baburane batandukane byemewe n’amategeko, bakaba bombi baragiye batangaza ko ntawe ukifuza kongera kubana n’undi.

Si ubwa mbere uyu mugore ashinjwa ibyo gusahura imitungo y’urugo

Muri Gicurasi 2014 ubwo Bizimana Ibrahim yafungwaga nyuma akavuga ko yari yagambaniwe n’umugore we, agifungurwa yasanze uyu mugore we yarasahuye imitungo aranimuka nk’uko tariki 7 Nyakanga 2014 babyiyemereye bombi mu kiganiro bagiranye n’abanyamakuru ndetse uyu mugore agasaba imbabazi umugabo we ko atazabyongera. Bizimana Ibrahim yabwiye Inyarwanda.com ko icyo gihe, ibyo umugore yari yarasahuye urugo yabigaruye ariko bimwe muri byo ntibigaruke.

Uku gusahura urugo byongeye no kuba intandaro yo kujya mu nkiko bashaka gatanya, nk’uko urwandiko rwo mu nzego z’ibanze twabashije kubonera kopi rubigaragaza. Muri uru rwandiko, ubuyobozi buvuga ko tariki 17 Ukuboza 2015, bwageze mu rugo rwa Bizimana Ibrahim bugasanga umugore yarasahuye urugo, agatwara ibikoresho birimo intebe, televiziyo, radio, frigo, ibitanda bitatu byo kuryamaho, imodoka, imyenda n’ibindi bikoresho byo mu rugo, bifite agaciro k’amafaranga y’u Rwanda arenga 3.000.000 hatabariwemo agaciro k’imodoka, ak’imyenda n’ibikoresho byo mu gikoni.

Gusa Mukabadege, nyuma y’iminsi micye yaje kugwa gitumo Apotre Ibrahim aho yari yarimukiye, ateza ubwega avuga ko ibintu umugabo yavugaga ko yasahuwe n’umugore, abimufatanye nyuma yo gukora iperereza akamenya ko umugabo yari yarabyiyibishije ngo amusige icyasha. Icyo gihe kandi, uyu mugore yahishuye byinshi ku mugabo we, aboneraho gushimangira ko yamuhuzwe kuburyo atakifuza ko basubirana.

N’ubwo umugabo ari Apotre, kuva yafungwa nta rusengero akibarizwamo

Kuva yafungwa, Bizimana Ibrahim ntiyongeye na rimwe gukandagira mu itorero Umusozi w’Ibyiringiro rya Runda yari abereye umuyobozi, kuko yavugaga ko yagambaniwe akanafungishwa n’abo muri iryo torero. Icyo gihe yahise arekera iby’itorero byose mu maboko y’umugore we ari nawe umukuriye mu itorero ariko ashaka gukomeza kuba umuvugabutumwa, ndetse yaje no kugera ku ntera yo kwimikwa akaba Apotre (Intumwa) atagifite itorero abarizwamo kugeza n’ubu n’ubwo avuga ko yashinze umuryango w’ivugabutumwa yise Repentance and Hollines ariko akavuga ko nta torero akibarizwamo.

Kwitandukanya n’itorero byarushijeho kugaragara cyane no guteza umwuka mubi mu itorero, tariki 28 Nzeri 2015, ubwo uyu mugabo yajyaga ku rusengero ruherereye i Runda, agakuraho inzugi ndetse akanarandura icyapa cy’uru rusengero, avuga ko rwubatswe mu kibanza cye ndetse akaba ari nawe warwubatse igihe yari umuyobozi, akaba ashaka gusubirana imitungo ye. Yashinjaga umugore we ari nawe muyobozi mukuru w’itorero, kuba ashaka gukoresha imitungo y’urugo mu by’itorero rye.

Umugabo ntiyemera umugore mu by’ivugabutumwa, n’umugore ntiyemera umugabo

Ubwo twaganiraga tariki 29 Nzeri 2015, Apotre Bizimana Ibrahim yashimangiye ko n’ubwo nta rusengero abarizwamo, abwiriza ahantu hatandukanye ariko mu itorero ry’umugore we akaba atahabwiriza kuko atemera uyu mugore we mu by’ivugabutumwa, kandi n’umugore akaba atamwemera. Yagize ati: "Ubundi mu mategeko y’Intumwa, Intumwa ntigira itorero uretse hano mu Rwanda... Amatorero yose ni ay’Intumwa, njye mbwiriza mu itorero iryo ariryo ryose kandi si na ngombwa ngo untumire, ndijyana iyo mfite ubutumwa bw’Imana ndagenda nkabutambutsa kandi ubutumwa bw’Imana ndabuhorana, kuko ijambo ry’Imana riri muri njyewe, ngenda njyanye ijambo ry’Imana nkaribwiriza ngataha. Mu musozi w’Ibyiringiro ho sindabwirizamo, kuko umuyobozi waho (ari nawe mugore we), ntabwo twubahana mu buryo bw’ivugabutumwa. Ntabwo twubahanye kubera ko ari njye ntanyemera, nanjye simwemera, gusa turemerana nk’umugore n’umugabo mu rugo... Nta rutugu rukura ngo rusumbe ijosi, iyo urutugu rwakuze rugasumba ijosi rwitwa inyonjo, njye sinshaka kuba inyonjo rero kuko niwe unkuriye mu by’itorero... Gusa nta n’aho duhurira ubu cyane kuko mu itorero simpagera... Kuba ubwo nayoboraga i Runda baramfungishije byo niyo ntandaro yatumye ntasubirayo, kuko n’ubwo nafunzwe icyo gihe, icyatumye ntasubirayo, itorero ryari ribifitemo uruhare".

Umugabo avugwaho ubusambanyi no kubyara abana benshi hanze, n’umugore afite uwe ariko bombi ntibigeze babyarana

Ubusanzwe, kwa Bizimana Ibrahim na Mukabadege Liliane bafite abana batanu ariko nta mwana n’umwe babyaranye, kuko bashakanye Mukabadege afite umwana umwe naho Bizimana Ibrahim afite abana bane. Bizimana Ibrahim aherutse gutangaza ko mbere gato y’uko umugore asahura urugo, yari amaze iminsi amubwira ko arambiwe kurera abana atabyaye, akavuga ko byatewe ahanini n’uko umwana mukuru wa Ibrahim, uyu mugore yashatse kumukoresha amanyanga se akaza kubimenya n’ubwo uyu Apotre Ibrahim atasobanuye neza iby’ayo manyanga. Nyuma ariko mu kiganiro Apotre Mukabadege yagiranye n’abanyamakuru, yavuze byinshi birimo kuba umugabo we afite abana benshi yagiye abyara hanze, n’ubwo ajya kunda kwemera ko afite batandatu gusa. Muri rusange, muri abo bana bose nta n’umwe babyaranye, akenshi umugabo agashinja umugore we ko anywa imiti ituma atabyara.

Mu byo bashinjanya harimo n’amarozi

Mu byo Apotre Ibrahim yagiye ashinja umugore we, harimo kuba yaragiye amutahura yashatse kumurogera mu biryo, gusa ibi ubwo abanyamakuru babibazaga Mukabadege muri Mutarama uyu mwaka, yarabihakanye abitera utwatsi. Yagize ati: "Ntabwo ibyo nigeze mbikora arabeshya rwose ni ukumparabika nk’umukozi w’Imana kubera ko azi ko avuze ikintu kiremereye kuko abantu bankunda kubera ko ndi umukozi w’Imana w’ukuri, aziko igisebo cyahita kinjyaho urusengero rugasubira hasi n’abakristo bagaseba niyo strategy akoresha, azakubwira n’ikindi kitari icyo ariko sinigeze mbikora n’imbere y’Imana ishobora byose".

KANDA HANO UREBE VIDEOS UTASANGA AHANDI