Mu Rwanda imibare y’abari gusanganwa ubwandu bwa COVID-19 mu iki cyumweru twaraye dusoje yakomeje kwiyongera kuko kuri iki cyumweru hagaragaye abantu 239 bashya basanganywe ubwandu bw’iki cyorezo biganjemo abo mu Ntara y’Amajyepfo.

Hari hamaze iminsi hatagaragara abandura bashya bageze muri iyi mibare ariko muri iki cyumweru twaraye dusoje, imibare yongeye kugera muri 200.

Nko ku wa Gatanu tariki 02 Mata 2021 habonetse abarwayi bashya 249 mu gihe kuri iki Cyumweru tariki 04 Mata 2021 habonetse 239.

Imibare y’abandura benshi ikomeje kugaragara mu Ntara y’Amajyepfo kuko muri 249 bagaragaye kuri iki Cyumweru, barimo 90 bo mu Karere ka Huye, 75 bo mu Karere ka Gisagara, 23 bo mu Karere ka Nyaruguru n’umunani (8) bo mu Karere ka Ruhano.

Ubuyobozi bw’Ibanze mu Ntara y’Amajyepfo buherutse kwiyemerera ko abaturage badohotse ku kubahiriza ingamba zo kwirinda iki cyorezo cya COVID-19.

Ubuyobozi ndetse n’abaturage, bavuga ko hari abantu benshi batacyambara udupfukamunwa n’abatwambara neza ku buryo ari byo bikomeje kuzamura imibare muri iriya Ntara.

Uturere tw’iriya ntara kandi twahawe umwihariko mu mabwiriza mashya kuko isaha yo kugera mu rugo muri turiya turere ari saa moya z’ijoro (19:00) mu gihe mu bindi bice by’Igihugu ari saa tatu z’ijoro (21:00).

UKWEZI.RW