Abasanganywe ubwandu bwa COVID-19 kuri uyu wa Gatanu tariki 02 Mata 2021, ni 249 mu gihe iyi mibare itaherukaga kuko hari hamaze iminsi haboneka abanduye bashya batarengeje 200. Hapfuye kandi abantu babiri.

Iyi mibare yo kuri uyu wa Gatanu Tarik 02 Mata 2021, igaagaza ko uretse bariya bantu 249 bashya basanganywe ubwandu bwa COVID-19, iki cyorezo cyanahitanye abagabo babiri barimo umwe w’i Nyanza w’imyaka 83 n’undi w’i Huye w’imyaka 40.

Kuri uyu wa Gatanu kandi hakize abantu 90 mu gihe abakirwa ari 1 459 barimo batandatu (6) barembye cyane.

Huye hagaragaye abarwayi bashya 60

Iyi mibare kandi igaragaza ko abasanganywe ubwandu bashya muri buri Karere aho aka Huye ari ko kagaragayemo benshi ari bo 60.

Uturere two mu Ntara y’Amajyepfo ni two dukomeje kugaragaramo abarwayi bashya benshi kuko aka Karere ka Huye gakurikirwa n’aka Ruhango kabonetsemo 27 mu gihe utundi turere nka Nyanza, Gisagara, Nyaruguru na Muhanga na two twaje mu 10 twa mbere.

Muri iki cyumweru, Guverinoma y’u Rwanda yasohoye amabwiriza mashya yo kwirinda icyorezo cya COVID-19, yahaye umwihariko Uturere two mu Ntara y’Amajyepfo kuko amasaha yo kugera mu rugo ari saa moya (19:00) mu gihe mu tundi uretse Bugesera two ari saa tatu (21:00).

UKWEZI.RW