Kuwa Kabiri tariki 27 Gashyantare 2018, Hakorimana Jean Claude wo mu mudugudu w’Indahemuka, mu kagari ka Mimuri, mu murenge wa Mimuri ho mu karere ka Nyagatare, mu ntara y’Uburasirazuba, yakubiswe azira kwiba ingofero yambarwa n’utwaye moto (Casque), abashinjwa kumukubita bakaba ari umukozi ushinzwe ubuhinzi mu murenge wa Mimuri ari nawe nyir’iri iyo ngofero yibwe, afatanyije n’umucuruzi witwa Niyonsenga.

Ibi byabaye mu ijoro ryo kuwa Kabiri tariki 27 rishyira kuwa Gatatu tariki 28 Gashyantare 2018, ahagana saa saba zo mu gicuku. Abaturage baganiriye n’ikinyamakuru Ukwezi.com bavuga ko umukozi ushinzwe ubuhinzi mu murenge wa Mimuri witwa Mucunguramfizi Andre afatanyije na nyir’akabari banyweragamo witwa Niyonsenga Abraham bakubise Hakorimana Jean Claude w’imyaka 28, bikaza kumuviramo gupfa.

Aya makuru kandi yemejwe n’umuvugizi wa Polisi mu ntara y’Uburasirazuba, CIP Kanamugire Theobald, mu kiganiro n’ikinyamakuru Ukwezi.com. Yagize ati : "Nibyo koko umukozi ushinzwe ubuhinzi mu murenge wa Mimuri, Mucunguramfizi Andrew afatanyije na nyir’akabari witwa Niyonsenga Abraham bakubise umusore witwa Hakorimana Jean Claude bakeka ko ari we wibye ingofero ya moto (Casque) y’uwo mukozi w’umurenge, bamaze kumukubita babona habura gato ngo ashiremo umwuka bamujyana kwa muganga niho yaguye, ariko ubu abo bagabo 2 tubacumbikiye kuri Polisi kuri Sitasiyo ya Mimuri mu gihe hagikorwa iperereza ngo bashyikirizwe ubutabera”.

Bivugwa ko uyu Hakorimana yaje muri aka kabari mu masaha y’umugoroba avuye mu murima azanye na mugenzi we basangiraga inzoga, nyuma amasaha amaze gukura uyu mukozi w’umurenge nawe wari muri aka kabari yazanye na moto asanzwe akoresha mu kazi ke ka buri munsi, yabuze kasike ya moto bakeka ko ari Hakorimana wayibye baherako bamwadukira barakubita kugeza ashizemo umwuka.

Ingingo y’151 mu gitabo cy’amategeko ahana ibyaha mu Rwanda, ivuga ko iyo gukubita cyangwa gukomeretsa umuntu ku bushake byateye urupfu, uwakoze icyaha ahanishwa igifungo kuva ku myaka icumi (10) kugeza ku myaka cumi n’itanu (15). Iyo yakoze urwo rugomo yabigambiriye cyangwa yabanje gutega igico, ahanishwa igifungo cya burundu.