konka coffee
KONKA

AMAKURU

UKWEZI

Kayonza: Kudasezerana kw’abashakanye bibuza abagore kwaka inguzanyo

Kayonza: Kudasezerana kw’abashakanye bibuza abagore kwaka inguzanyo
21-06-2017 saa 13:22' | By Chief Editor | Yasomwe n'abantu 1178 | Ibitekerezo

Kuri uyu wa Kabiri tariki 20 Kamena 2017, abagore bibumbiye mu makoperative atandukanye yo mu karere ka Kayonza akorana n’umuryango Women for Women International, bahuriye mu mahugurwa bagaragarijemo ko kudasezerana kw’abashakanye bituma batinya kwaka inguzanyo mu bigo by’imari.

Aya mahugurwa yateguwe n’umuryango Women for Women International ufatanyije n’ubuyobozi bw’akarere ka Kayonza, yari agamije gukangurira abagore gukorana n’ibigo by’imari, aho babanje kwigishwa imikorere n’akamaro k’amabanki. Insanganyamatsiko y’aya mahugurwa yagiraga iti : “ Ibigo by’imari, umusingi w’iterambere ry’amakoperative”.

Aya mahugurwa yitabiriwe n’abahagarariye ibigo by’imari bikorera mu karere ka Kayonza maze bafata umwanya uhagije mu gusobanurira abagore imikorere n’imikoranire n’ibigo by’imari.

Nyuma y’aya mahugurwa, bamwe mu bagore bibumbiye mu makoperative bagaragaje imbogamizi zimwe na zimwe bahura na zo, aho bavuze ko kuri bo, kubona ingwate ari ingorabahizi, kandi bakaba badasobanukiwe imikorere n’imikoranire na BDF kugirango ibashe kubishingira. 

Indi mbogamizi iza ku isonga mu kubabangamira ni uko kudasezerana kw’abashakanye bituma abagore baba badafite uburenganzira ku mitungo yabo bashakanye bikababera ikibazo mu kubona ingwate isabwa ngo babone inguzanyo.

Kabazayirwa Gisele, umuturage utuye mu murenge wa Nyamirama akarere ka Kayonza ashima intambwe bagejejweho n’umuryango women for women kuba yarabigishije byinshi birimo ububoshyi, ubuhinzi, ubworozi, kwihangira imirimo ndetse no gukorana n’ibigo by’imari bityo akaba yiteze kwiteza imbere no guteza igihugu imbere muri rusange.

Umunyamabanga nshingwabikorwa w’umurenge wa Nyamirama, Mukunzi Athanase, yashimye WFWI ibafasha guteza imbere abaturage bayobora, asaba abaturage gukorana n’ibigo by’imari ndetse no kujya bizigamira kuko bidakorwa n’uwasaguye ahubwo bisaba kwizirika umukanda. 

Mukunzi yakomeje avuga ko kuba abagore bibumbiye mu matsinda binabafasha kubagezaho n’izindi gahunda za leta zirimo na gahunda y’amatora ateganyijwe muri kanama uyu mwaka.

Aya mahugurwa y’umusi 1 yitabiriwe n’abagore basaga 300 bibumbiye mu matsinda y’abagore bo mu karere ka Kayonza.


Tanga Igitekerezo
Ibitekerezo
IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA