konka coffee
KONKA

AMAKURU

UKWEZI

Rwanda Shima Imana 2017 ifite umwihariko wo kubahiriza ibyifuzo by’Abanyarwanda bose

Rwanda Shima Imana 2017 ifite  umwihariko wo kubahiriza ibyifuzo by’Abanyarwanda  bose
15-09-2017 saa 15:12' | By Vincent Nsengiyumva | Yasomwe n'abantu 1284 | Ibitekerezo

Igiterane gikomeye gihuza amadini n’amatorero ya Gikiristo akorera mu Rwanda ‘Rwanda Shima Imana’ kigiye kongera kuba ku nshuro yacyo ya gatandatu mu mu materaniro yagutse azababera mu mpande zose z’igihugu tariki 24 Nzeri 2017. Iki giterane gifite umwihariko wo kuzubahiriza ibyifuzo by’abanyarwanda kigagezwa ahantu hose mu gihugu ndetse no Gushima Imana ku bw’amatora ya Perezida wa Repubulika yagenze neza.

Iki giterane cyari gisazwe kibera mu Mujyi wa Kigali buri mwaka, aho Abanyarwanda by’umwihariko abakirisitu bahuriraga kuri Stade Amahoro bagashimira Imana ibyo yakoreye u Rwanda, kuri ubu noneho cyegerejwe Abanyarwanda aho kizabera mu bice byose by’igihugu ku buryo bizorohera buri wese kubyitabira.

Komite itegura iki giterane yatangaje ko muri uyu mwaka wa 2017 habaye impinduka iki giterane nticyaba mu kwezi kwa Munani nk’uko bisanzwe kubera guhurirana n’igihe cyo kwitegura amatora y’umukuru w’igihugu.

Bishop Bilindabagabo Alexis Umuyobozi w’Umuryango Peace Plan utegura igiterane cya ‘Rwanda shima Imana’ yavuze ko iki giterane gifite intego yo kwimakaza umuco w’imitekerereze yubaka n’umuco wo gushima Imana.

Yagize ati :"Rwanda Shima Imana ifite intego zo guha isura imitekerereze kugira ngo Abanyarwanda bagire ibitekerezo byubaka ariko banige umuco wo gushima Imana kuko biri mu mitekerereze myiza.”

Bilindabagabo yanakomeje avuga ko iki giterane cya Rwanda Shima Imana 2017 gifite umwihariko, ugereranyije n’ibindi biterane byatambutse, ngo kuko iki cyo cyegerejwe Abanyarwanda bose ndetse bakazaba banashima Imana kubw’amatora ya Perezida wa Repubulika yagenze neza.

Yagize ati “ Rwanda Shima Imana aho kugira ngo ibe umunsi umwe, hari igikorwa cyayibanjirije cyo kwifatanya n’abayobozi bakuru b’igihugu barimo na Perezida wa Repubulika yabaye tariki 10 Nzeri uyu mwaka. Undi mwihariko ni uko igikorwa cyo gushima Imana cyegerejwe abanyarwanda bose. Kizaba ku cyumweru tariki ya 24 mu gihugu hose hazabera amateraniro yo gushima Imana.”

Yanakomeje avuga ko Muri Rwanda Shima Imana hatarebwa imyemerere y’umuntu uyu n’uyu ko ahubwo haba hakenewe ko buri munyarwanda atambutsa ishimwe ry’ibyo Imana yamukoreye hatitawe ku idini cyangwa itorero abarizwamo.

Igiterane Rwanda Shima Imana cyatangiye mu Rwanda mu mwaka wa 2012 binyujijwe mu muryango Rwanda Driven Ministries /PEACE Plan kikkaba gihuza amatorero ya Gikirisitu mu gikorwa cyagutse cyo gushima Imana .

Pasteur Kamanzi Theophile, Umuhuzabikorwa wa Rwanda Shima Imana yashimangiye ko iyi gahunda yo guteranira hamwe kw’amadini n’amatorero imaze kubageza kuri byinshi birimo;gushyira hamwe kw’abayobozi b’amadini n’amatorero, Ubwumvikane bw’abayoboke b’amadini n’amatorero, Ubufatanye bw’amadini n’amatorero na Leta ku bw’inyungu n’abanyarwanda n’ibindi.

Pasteur Kamanzi yaboneyeho kurarikira Abanyarwanda bose kwitabira iki giterane, bagafatanyiriza hamwe kuramya no guhimbaza Imana kubwa byinshi yakoreye u Rwanda ndetse na byinshi byiza biri imbere dore ko akaruso banabyegerejwe.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...