konka coffee
KONKA

AMAKURU

UKWEZI

Abavuga ko Jenoside yatewe n’ihanurwa ry’indege ni abashinyaguzi mu bandi - Min. Kaboneka

Abavuga ko Jenoside yatewe n’ihanurwa ry’indege ni abashinyaguzi mu bandi - Min. Kaboneka
9-04-2017 saa 23:56' | By Vincent Nsengiyumva | Yasomwe n'abantu 2161 | Ibitekerezo 1

Minisitiri w’Ubutegetsi bw’igihugu, Francis Kaboneka, yavuze ko abantu bavuga ko Jenoside yakorewe abatusi mu Rwanda yatewe n’ihanurwa ry’indege y’uwahoze ari Perezida, Juvenal Habyarimana, baba bashaka gupfobya no guhakana ibyabaye ndetse no gushinyagurira abacitse ku icumu rya Jenoside.

Ibi Minisitiri Kaboneka yabivuze kuri iki Cyumweru tariki ya 09 Mata 2017 mu muhango wo kunamira abatutsi bashyinguye mu rwibutso rwa Ntarama mu Bugesera rwahoze ari Kiliziya, ubu rushyinguyemo imibiri y’abasaga 5000.

Minisitiri Kaboneka yavuze ko abavuga ko Jenoside yakorewe abatutsi yatewe n’ihanurwa ry’indege y’uwahoze ari Perezida, Habyarimana Juvenal, baba birengagije itegurwa cyangwa amagambo yagiye akoreshwa nko kurimbura, gutsemba inyenzi n’ibindi.

Yagize ati “Abantu bajya bavuga ngo ingengabitekerezo cyangwa Jenoside yakorewe abatusi yaturutse ku ihanurwa ry’indege ariko abantu bakiyibagiza n’uburyo byagiye bitegurwa nk’amagambo yagiye akoreshwa harimo kurimbura, gutsemba inyenzi. Iyo urebye ayo magambo yose uko yagiye avugwa kugeza ku ndunduro ya 1994, abavuga ngo Jenoside yatewe n’indege ni abashinyaguzi mu bashinyaguzi twese tugomba kurwanya.”

Kaboneka yakomeje avuga ko ibi byateguwe kera cyane, kuko mu mwaka w’1964, Perezida wa Repubulika icyo gihe, Kayibanda yavuze ko n’ubwo inyenzi zakibeshya zigafata Kigali yaba imbarutso yo kurimbura ubwoko bw’abatutsi mu buryo bwihuse kandi yabivugaga hari abatutsi benshi bamaze kwicwa.

Minisitiri Kaboneka yaboneyeho gusaba ababashije kurokoka kuzesa imihigo basigaranye bahesha ishema imiryango bakomokamo kandi banahesha ishema Urwababyaye.

Yanabasabye kandi kwibuka banishima kuko hari bamwe banze ikibi bakitandukanya nacyo ndetse n’Inkotanyi zahagaze zigahangana n’abicanyi ukuri kugatsinda urupfu.

Yagize ati “Twibuke ariko tunishima kuko dufite nka ba Silas bashobora guhagarara bakavuga bati ‘njyewe nanze ikibi nitandukanya nacyo’, ko dufite Inkotanyi zahagaze zigahangana n’abicanyi ukuri kugatsinda urupfu, ibyo byonyine bijye biduha imbaraga.”

Aha yaboneyeho gushimira Ntamfurayishyari Silas wari umusirikare muri EX-FAR watanze ubuhamya bw’uburyo yabashije kurokora abantu bagera kuri 20.

Uyu Ntamfurayishyari Silas wari umusirikare muri EX-FAR yatanze ubuhamya bw’inzira y’umusaraba yagiye anyuramo kugirango abashe kugira abatutsi arokora, aho yabashije kurokora abagera kuri 20 abinyujije mu nzira zigoye cyane ndetse bikagera aho ahigwa ngo nawe yicwe akaza kurusimbuka.

Ntamfurayishyari Silas. mu buhamya bwe burebure yavuze ko aterwa agahinda gakomeye no kuba yarabaye mu gisirikare cyaranzwe n’amacakubiri ndetse kikanagira uruhare mu kwica abatutsi kandi ari cyo cyakagombye kubarokora.

Mu batanze ubuhamya kandi harimo na Niwemugeni Chantal warokokeye i Ntarama, aho yagarutse ku nzira y’umusaraba yanyuzemo akaza kurokoka mu buryo na we atarasobanukirwa kugeza magingo aya.

Urwibutso rwa Jenoside rwa Ntarama ruri ahahoze Santarali, rukaba rushyinguyemo imibiri isaga 5000 y’Abatutsi bari bahahungiye ubwo bibwiraga ko ntawabasanga muri Kiliziya ngo abice, bakaza kwicwa n’Interahamwe zifatanyije n’ingabo za leta y’icyo gihe.

Aba bantu bose bishwe tariki ya 15 Mata 1994, hakoreshejwe imbunda, gerenade, intwaro gakondo nk’imihoro n’amahiri, abandi batwikishwa peteroli, matola ndetse bahirikirwaho igikuta cy’icyari igikoni cy’abapadiri, n’aho impinja zicwa zikubiswe ku bikuta.


INKURU ZA :
Tanga Igitekerezo
Ibitekerezo 1
lg Kuya 11-04-2017

MURI 59 NTA NTEGE YARI YAGUYE AHUBWO NUMUVUMO, WURWANGO, NUBWICANYI ,KERETSE IYO ABAHUTU IYO BICANYE UBWABO NTAKIBAZO KUKO HABYARIMANA UBWE YARI. UMWICANYI WAMAZE ABA HUTU , KANDI NTIBAVUZE, KAYIBANDA NU MUGORE WE NTABWO BISHWE NABATUTSI, ABANYA, POLIKI BICIWE MU RUHENGERI NTIBISHWE, NABATUTSI, NTAWAVUZE, UWAVUZE KO AGIYE GUTEGURA, IMPERUKA NTIYARI UMUTUTSI, KUVUGA INDEGE, NUGUSHAKA URWITWAZO RWO GUHISHA, UBUGOME KUKO NO KUVUGA ABAYIHANUYE BARABANANIYE KUKO BATAKWIVAMO*

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...