konka coffee
KONKA

AMAKURU

UKWEZI

Ubunini bwa dosiye bwakuruye impaka mu rubanza rwo kwa Rwigara, basaba n’amafaranga

Ubunini bwa dosiye bwakuruye impaka mu rubanza rwo kwa Rwigara, basaba n’amafaranga
11-10-2017 saa 09:52' | By Chief Editor | Yasomwe n'abantu 15004 | Ibitekerezo 3

Kuri uyu wa Gatatu tariki 11 Ukwakira 2017, Diane Rwigara, nyina Adeline Rwigara na murumuna we Anne Rwigara bongeye kugezwa imbere y’urukiko rwisumbuye rwa Nyarugenge ngo baburanishwe ku byaha bakurikiranyweho ku bijyanye n’ifunga n’ifungura ry’agateganyo. Muri uru rubanza, habaye impaka ndende ku bijyanye n’ubunini bwa dosiye, Adeline Rwigara yaheragaho asaba ko urubanza rwasubikwa we agashaka undi umwunganira mu mategeko, hanyuma Me Pierre Celestin Buhuru akaburanira abakobwa be, kuko ngo dosiye ari nini cyane itahabwa umunyamategeko umwe. Abo kwa Rwigara kandi, bagarutse ku by’uko bahabwa amafaranga ku yo Polisi yafatiriye igihe hakorwaga isakwa mu rugo rwabo mu bikorwa by’iperereza.

Diane Rwigara wenyine akurikiranyweho icyaha cyo gukora no gukoresha inyandiko mpimbano ariko bose uko ari batatu bahurira ku cyaha cyo kugambirira guteza imvururu cyangwa imidugararo muri rubanda. Umubyeyi wabo Mukangemanyi Rwigara Adeline we yihariye icyaha cy’ivangura no gukurura amacakubiri.

Iburanisha rikimara gutangira, Adeline Rwigara yasabye ko yakunganirwa mu mategeko na Me Gatera Gashabana, agaragaza inzitizi y’uko adashobora kuburana adafite umwunganira kandi ngo ubunini bwa dosiye butatuma Me Pierre Celestin Buhuru abasha kubunganira uko ari batatu.

Me Pierre Celestin Buhuru nawe yavuze ko yiteguye kuburanira Anne Rwigara na Diane Rwigara, ndetse akomeza kugaragaza ko ubunini bwa dosiye bwatumye n’ubu hari ibyo yifuza muri dosiye atarahabwa.

Adeline Rwigara yavuze ko yumva yahabwa uburenganzira bwe akunganirwa n’undi munyamategeko yahisemo witwa Me Gatera Gashabana, kandi asaba ko yahabwa amafaranga yo kwishyura uwo munyamategeko, kuko ngo ayo bari bafite Polisi yayafatiriye ubwo hakorwaga isakwa mu rugo rwabo mu rwego rw’iperereza ku byaha bakurikiranyweho.

Diane Rwigara nawe ahawe ijambo yavuze ko atigeze ahabwa umwanya wo kuvugana n’umwunganira ndetse ko yasabye kumuhabwa kera bikananirana, bitewe ahanini n’uko ngo nta mafaranga bari bafite yo kumushaka kubera ko amafaranga bafatiriwe na Polisi batari bahaweho ayo bari bakeneye.

Nyuma y’umwanya munini impande zombi, urw’abaregwa n’urw’ubushinjacyaha ziri mu mpaka ku bijyanye n’uko Adeline Rwigara ataburana ahubwo akabanza agashaka umwunganira, umucamanza yanzuye ko Inteko y’abacamanza igiye kwiherera mu gihe cy’iminota 30, bagafata icyemezo kuri iyo nzitizi.

N’ubwo iminota 30 yarenze, Urukiko nyuma yo kwiherera rwafashe umwanzuro w’uko ku bijyanye n’inzitizi zatanzwe na Adeline Rwigara, Itegeko Nshinga ry’u Rwanda rimwemerera uburenganzira bwo kubona umwunganira no kwihitiramo umwunganira mu mategeko, bityo akaba agomba kwemererwa ibyo asaba.

Ku bijyanye n’uko Adeline Rwigara asaba urukiko ko rwategeka Polisi kubaha amafaranga ku yo bafatiriye, Urukiko rwasanze igihe kitaragera ko ibyafatiriwe bisubizwa. Rwahise rusubika urubanza maze rwimurirwa kuwa Gatanu tariki 13 Ukwakira 2017, kandi ngo nta yindi mpamvu n’imwe izatuma ruzongera gusubikwa.


INKURU ZA :
Tanga Igitekerezo
Ibitekerezo 3
yves Kuya 13-10-2017

imana ibarebe tur kubasengera

Yoyo Kuya 12-10-2017

Ntibizoroha

nzaramba Kuya 11-10-2017

ahaa tuvuge se ko diane ajya gushoza intambara atari aziko nibi byogufungwa birimo. ntihagire umuririra rero

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
BAHO
INKURU ZIKUNZWE
Ibitekerezo
Loading...
IZINDI NKURU WASOMA
Loading...